Shillong, Lber 20 : Ka Iingkashari Meghalaya High Court hynne ka sngi nyngkong, kala bthah ia ka Central Industrial Security Force (CISF) ba kan pynpaw hapoh ka lai taiew, ia ka jinglong ba kloi ban wan tehlakam ia ka jingkhaii tuh ia u dewiong ha Meghalaya.
Haba shong bishar ia ka PIL, ka Iingkashari full bench bala khlieh da u Chief Justice Sanjib Banerjee ha ka hukum kala ong “Ai ba kane ka kam kan wan phai biang hadien ka 3 taiew na ka bynta ka CISF ba kan pynpaw ia ka jinglong kloi”.
Haha buddien ia ka hukum ba pynmih ha ka 13 tarik Lber, u Dr N Mozika ula pyntip ba ki jingdonkam ba hap ban pynkhreh na ka bynta ban wanrah ia 10 pyrton ki CISF kan shimpor kumba saw taiew eiei.
U Dr Mozika ula kdew ba ka CISF kan wan halor ka nongrim ba ka jingbuh ia ki kan long tang ar ne lai snem shuwa ba ka Jylla kan buh iala ki jong ki briew ban shimti ia ka kam.
Ka Iingkashari kala ong naba ka Jylla kala pynpaw ia ki plan ban shna lane ai jaka sah ia ki shipai ka CAPF, ka Jylla ka dei ruh ban iatreulang ha kaban ai jaka sah ia ki shipai ka CISF kynthup ia ki Commandant jong ki pyrton.
Kala bthah ruh ba ka CISF ka dei ban ithuh lane buh ia uwei lane bun ki briew ki ban peit ia ka kam da kaba iabujli bad ong “Kine ki shipai kidei ban ioh ia ka shithi thungkam na u Justice Katakey bad ha ka jingiadon lang ki nongmihkhmat n aka Jylla, kin iapeit ia ki jaka bad ki jingdonkam ban buh ia kine ki 10 pyrton”.
Ha kajuh ka por, ka Iingkashari kala bthah ruh ia ka Sorkar Jylla ban pynthikna ba ki 23 tylli ki weighbridge bala tyrwa ki dei ban don noh bad ba dei ruh ban pynieng kham bun ki weighbridge ha ki jaka ba kongsan da kaba iasyllok lang bad ki shipai CISF bad hapoh ka jingpyni lynti jong u Justice Katakey.
Ka Iingkashari kala buh ban shong bishar biang ia kane ka mukotduma ha ka 12 tarik u Iaiong.
