Shillong, Lber 24 : U Justice (retd) BP Katakey, uba khlieh ia ka Committee ba thung da ka Iingkashari Meghalaya High Court, ha ka sngi Nyngkong, ula pan jingshai halor ka kaiphod jong ka aerial survey (survey na suin) bala pynlong hapoh ka shi kilometer radius jong ki jaka lum dewiong ba lap ha ki saw tylli ki District ka East Jaintia Hills, West Khasi Hills, South West Khasi Hills bad South Garo Hills.
Haba kren sha ki lad pathai khubor, u Katakey ula ong artylli ki mat la iakren bad iasyllok ha ka jingia lang ba long hynne ka sngi Nyngkong.
“Ngi la bthah ia ka Sorkar ba kan pynlong ia ka aerial survey hapoh ka shi kilometer radius jong ka jaka lum dewiong (ha ki saw tylli ki district). Ka Sorkar ha u 2019 kala ai ia ka affidavit hapoh ka Iingkashari Surpreme Court ba pyni ia ki jaka ba lum ia u dewiong. Halor kane, ngi la bthah ban leh ia ka survey lait noh ia u dewiong bala dep shim jingkhein. Ngi kwah ban iohi la hapoh kane ka shi kilometer radius u don ne em u dewiong bym pat dep shim jingkhein” ula ong.
“Ka kaiphod (ia ka aerial survey) la dep ban aiti ha ka 19 tarik Lber bad la iakren ha ka jingialang hynne ka sngi hynrei nga kwah katto katne ki jingpynshai bad la bthah ia ki ba kin ai ha nga ia kita ki jingpynshai, kaba nga khmih lynti ban ioh lashai ka sngi” bynrap u Katakey.
Halor ka jingujor bala mudui da ki saw ngut ki briew pyrshah ia ka kam tih dewiong beain ha South Garo Hills, u Katakey ula ong ba ka kaiphod jingtohkit ia kane ka kam la dep ban aiti da ka Committee kaba khlieh da u Naba Bhattacharjee sha u.
“Naba ki dang don ki jingtohkit ba hap ban leh, ka Sorkar kala bthah ia u Deputy Commissioner ka South Garo Hills ban pynlong ia ka jingleit pynshisha marmet bad aiti ia ka kaiphod hapoh ka shitaiew. Kumta, ia ka kaiphod ngi khmih lynti ban sa ioh hadien shitaiew” ula bynrap.
Halor ka jingsdang jong ka jingtih dewong da ka jingstad saian ha Meghalaya, u Katakey ula ong “Ka dei ban don ka bor ka ban khmih ia kane. Ym don ba lah ban batai ba ka lah ban don ka jingtih dewiong beain hangne ha Meghalaya hynrei kawei ka kam kaba la iathuh ia nga ka long ba ha ka jingai jingbit bad kano kano ka jingbit bala ai ban tih dewiong da ka jingstad saian, ka don ka kyndon kaba ngam pat iohi hynrei la iathuh ia nga ba ia ka jingkitkhlieh la tynrong ha ki nongtih dewiong ba kin tap lut ia ki thliew bas hem hapoh ka shi kilometer radius na ka jaka ba ki trei”.
Ula ban jur ba uno uno u dewiong bala shem shabar jong ka depot bala buh da ka Coal India Limited (CIL) u dei uba beain hangne ha Jylla Meghalaya.
 BP Katakey, uba khlieh ia ka Committee ba thung da ka Iingkashari Meghalaya High Court, ha ka sngi Nyngkong, ula pan jingshai halor ka kaiphod jong ka aerial survey (survey na suin) bala pynlong hapoh ka shi kilometer radius jong ki jaka lum dewiong ba lap ha ki saw tylli ki District ka East Jaintia Hills, West Khasi Hills, South West Khasi Hills bad South Garo Hills.){kind=link}