Nongpoh, Lber 16: Ka Meghalaya Asha Worker Union (MAWU) ha ka sngi Nyngkong, kala leit iakynduh bad pan jingshai na u Deputy Commisioner ka Ri Bhoi District Abhilash Baranwal, halor ka jingshah wengkam khlem nongrim ki katto katne ngut ki nongtrei ASHA.
Ia ka MAWU la lamkhmat da ka Kong Sony Kharjana kum ka Adviser ha ka jingiadonlang kiwei kiwei ki nongkitkam bad ki nongtrei ASHA.
Haba kren sha ki nongthoh khubor hadien ka jingiakynduh ia u DC, ka Kong Kharjana ka la ong ba kum ka kynhun ka hap ban iakynduh ia u DC ban pan jingshai halor ka jingshah wengkam kaba khlem nongrim bad khlem ka jingpyntip shwa ia ki nongtrei ASHA hapoh Ri Bhoi District.
“Ka jingshah wengkam ka long kabym iahap namar la shu weng syndet khlem da bud thik ia ki kyndon bad ban ai jingtip shwa kumba lai bnai hashwa ka jingwengkam bad kane ka ktah ia ka lawei jong ki nongtrei ASHA kiba la ai ka jingshakri kaba janai la bun bun snem”, ong ka Kong Kharjana.
Shuh shuh ruh, ka la iathuh ba u DC, u la pyntip ba ka jingwengkam ka dei namar ka jingbym trei bha ka jong ki, hynrei kum ka nongialam ka la ieng skhem halor ka nongrim ba ki nongtrei ASHA ki dei kiba treishitom bad kiba ju iarap bha ia ka sorkar ha kiba bun ki khep.
Namar kata, ka MAWU ka kyntu ia u DC ba un shimkhia ha ka ban tuklar halor kane ka kam bad ban bishar bniah hashwa ban shim ia kano kano ka rai.
 ha ka sngi Nyngkong, kala leit iakynduh bad pan jingshai na u Deputy Commisioner ka Ri Bhoi District Abhilash Baranwal, halor ka jingshah wengkam khlem nongrim ki katto katne ngut ki nongtrei ASHA.){kind=link}