Shillong, Nailur 22 : Ka Myntri ka Tnad ka Koit ka Khiah Kong Ampareen Lyngdoh ha ka sngi Thohdieng kala pyntip ba ka Tnad kala pan ia ka jingshai na ka Tnad Home (Political) bad ruh ka Tnad Law halor ka rai jong ki katto katne ki District ban ai iaki Provisional Permanent Residency Certificate sha ki samla pule MBBS jong ka Open Category.
Haba wanrah ia ka statement hapoh ka Iingdorbar ba iadei bad ka call attention notice u MLA ka North Shillong Bah Adelbert Nongrum, ka kong Ampareen kala ong “ Namar ka jingbym long shai bha halor ka bynta jong ki bor district haba iadeibad ka jingai ia ki Permanent Residency Certificate, naba don katto katne ki District kila ai ia ki Provisional PRC sha ki samla pule Open Category dang shen, la rai ban phah ia kane ka kam sha ka Tnad Home (Political) bad ruh sha ka Tnad Law ban pan jingshai”.
Ka Kong Ampareen ka tnad mynta ka dang ap sa ia ka jingpynshisha ia 2 ngut ki kyrtong kiba shah jied ban leit pule MBBS na ka bhah pule ka Jylla.
Ka Meghalaay kala ioh 92 seat mynta u snem bad sa ae seat napoh ka central pool. Napdeng kine, 52 seat ki dei na ka central pool, 13 RIMS, Imphal, 14 NEIGRIHMS Shillong, 3 Tripura bad 10 ha Assam.
Ka kong Ampareen ka ong ba kat kum ka jingkam nongshongshnong da ki kyrtong, la bthah ia ki Deputy Commisssioner ba kin pynshisha ia ka jinglong trai shnong ba pura jong ki.
Ka pyntip ba ka Tnad kala ioh pdiang ia ki kaiphod na ki DC bad dei halor kine ki kaiphod bad ki kot ki sla bala ai, ka Tnad kala pynmih ia ka jingai bhah pule MBBS ha ka 31 tarik Nailar, 2023 bad hadien ka jingioh biang sa 2 seat na ka central pool, ia kane ka jingai seat la pynthymmai biang ha ka 4 tarik Nailur 2023.
Ka Myntri ka ong ba hadien ka jingioh pdiang ia ki jingujpr na ki katto katne ki kynhun Sengbhalang, ka Tnad ka Koit ka Khiah kala pynmih ia ka jingpynbha ha ka 6 tarik Nailur 2023, ba pynsangeh ia ka jingai bhah pule jong ka Open category katbym pat lah ban pynshisha ia ka jinglong trai shnong jong ki kyrtong kat kum ka OM ka Tnad Home (Political) ba pynmih ha ka 10 tarik Jylliew, 1983.
Ki phra ngut ki samla pule ba shah jied ha ka Open category ki kynthup ia u Mehbub Hassan, Monimul Ekram Mondall, Mahmudul Islam, Atida Zaman, Chiranjit Kumar Paul, Angoor Zaman Hoque, Abul Kala, Golam Mahdi Alom bad Ayush Kumar.
Kat haduh ka 21 tarik Nailur, ka jingpynthikna ia ka jaka sah jong ki hynriew ngut ki samla pule kala wan poi. Kine ki kynthup ia u Mehbub Hassan, Md Mahmadur Islam, Atifa Zaman, Chiranjit Kumar bad Angoor Zaman Hoque kiba la ai ia ka PRC na ka bynta ka higher education bad training bala ai da u SDO Dadenggre sub-division West Garo Hills bad u Ayush Kumar uba la ai ia ka PRC bala ai da u DC ka East Jaintia Hills.
