Shillong, Jymmang 17: Ka seng Hynñiewtrep Achik National Movement (HANM) hynne ka sngi Balang, kala pan jing pynshai na u Chief Secretary ka Jylla halor ka jingmyntoi ba ka Jylla ba ioh na ka jingwan jong ka Northeast Gas Grid Project kaba la sdang treikam ha Umden bad Nongthymmai ha Ri-bhoi District.
Haba kren sha ki lad pathai khubor u General secretary ka HANM East Khasi Hills samla Bawandonbok Nongsiej ula kam ba ia ka Northeast Gas Grid Project la bei pisa da ka sorkar pdeng ha ka jinglut ka ba kot T.9000 klur hynrei kumba ka long mynta, ki trai jaka ki khlem pat ioh ia ka jingiarap na katei ka company.
U samla Bawandonbok Nongsiej u la ong ba katkum ka jingioh jingtip, kane ka Project ka khlem don kano kano ka jingpyrshah ne jingpynthud haba iadei bad ka jingia NOC ban buh ia katei ka Project hynrei kaba la pynlygngoh ia ka seng ka long ba ym don uwei ruh u bad Khasi ne ki trai shnong ba sah ha kitei ki shnong ki ba ioh kam ha katei ka Project.
“Ngi la dep ban aiti daka Dorkhas sha u Chief Secretary ban ioh ka jingpynshai haba iadei bad katei ka Project, kumjuh ruh ban tip, hato ka wanrah jingmyntoi ne em ia ki nongshong ka dong ka thaiñ Umden bad Nongthymmai bad kumjuh ruh ia ka jylla hi baroh kawei haba ia ka kane ka kam la ioh ban trei bad pyniaid da ki briew na ka jylla Assam bad jylla Manipur” la ong u samla Bawandonbok.
U samla Bawandonbok ula ong ba kane ka Company North East Gas Grid Project kaba don ha Ri-bhoi district ka la iaid shakhmat ha ka jingtreikam bad kane ka company ka don jingthmu ruh ban buh ia ka jaka treikam sa sha East Khasi Hills District, West Khasi Hills District bad Jaintia Hills. Hynrei haduh kine ki sngi ymdon uwei ruh u nong Meghalaya u ban iohkam ioh jam ne ioh jingmyntoi na katei ka Project.
