Pan jingpynshai ka HITO ba plie dukan kyiad ha surok National Highway

Shillong, Risaw 07 : Ka Hynniewtrep Integrated Territorial Organisation (HITO) kala pan jingpynshai halor ka jingkynnoh plie ia ki dukan kyiad beain da kaba thoh kyrteng kum ki “Shop Open” ha shi lynter ka surok National Highway.

Ha ka shithi bala aiti sha u Commissioner of Excise ha ka sngi Ba-ar, ka HITO kala ong “Ngi dawa ia ka jingpynshai ba mar dor halor ki kyndon ain kiba shah ia ki dukan kyiad ba kin dir kyiad, kaba long pyrshah ia ka hukum ka Iingkashari Supreme Court ba pynmih ha u 2016”.

Kane ka Seng kala pyntip ba ki jingtip bala ioh lyngba ka Right To Information Act (RTI) bala pan da u General Secretary Wanbun N Dkhar, la pynpaw ba kine ki dukan kyiad kila plie bad die kyiad khlem ka jingioh ia ki jingbit na ka National Highway Authority of India (NHAI) lane ka Ministry of Road Transport and Highways.

“Ka pynkhuslai shibun ba kine ki dukan kila ialam bakla da kaba ai kyrteng kum ki “Shop Open”, ka jingkam kaba ym tang ba shukor hynrei ka pynkhein ruh ia ki kyndon ain bala buh” kala ong haba kdew ia ka hukum ka Iingkashari Supreme Court u snem 2016, kaba khang ia ka jingdie kyiad ne wine ha ki surok National Highway ban tem ia ka jingniah kali hapdeng ka jingshoh khaw iang, ka jingteh kyndon kaba hap ban pyntreikam pyrrkhing bha da ka NHAI bad ki bor ka Sorkar Jylla.

Ka HITO ka ong ba ki jingjia aksiden ba dang shen na ka jingniah kali ki briew ba shoh khawiang, kaba la shim ia bun ki jingim briew, ka pyni ia ka jingdonkam ia ki ain kiba khlain ban leh eiei pyrshah ia ki dukan kyiad ba beain bad bynrap “ Da kaba pyntreikam thikna ia ki kyndon bala buh, ngi lah ban wanrah ia ka sawdong sawkun kaba shngain bad iada ia ki jingjia aksiden hadien habud.”.

Nalor kane, kala pynpaw ia ka jingsngewkhia halor ka jingbym lah jong ka Tnad Excise ka Jylla ban pynthymmai ia ki Rules bala don lypa lane ki kyndon haba don ka hukum jong ka Iingkashari Supreme Court.