Shillong, Nohprah 30 : U Myntri kam jngohkai Bah Paul Lyngoh ha ka sngi Nyngkong, ula kyntu ia kito ki kynhun ba pyrshah ia ka Meghalaya Economics & Investment Promotion Policy (MEIPP) ba kin ai jingmut lem sha ka rai jong ka Sorkar ban thied bad pyllang jaka (Land Bank) na ka bynta ki kam pynroi.
Kane ka jingkren kala mih kum ka jingkynthoh ia ka jingpyrshah halor ka rai jong ka Sorkar ban pyn kylla ia ka Meghalaya State Investment Promotion Facilitation Act, kaba thmu ban aibor ia ka Investment Meghalaya Agency (IMA) ba kan thied jaka bad ai pateng ia ki jaka sha ki nongsengkam.
“Lada phi on gem (ia ka Policy ka Sorkar) kaei pat kawei ka lynti ia ka jingong em jong phi? Wan sahkhmat ban pyni ha ngi ia ki jingai jingmut jong phi da ka jingthoh. Lada ki kham lah ki jong phi ia ka policy jong ngi, ngi lah ban iaid da kane ka lynti” ong u Bah Paul haba iakren bad ki nongthoh khubor.
Haba pynpaw ba ka MEIPP ka dei ka Policy, kaba la pdiang bad mynjur da ka Iingdorbar Thaw Ain ka Jylla, ula ong “Kumta ka jingpynkha ia kine ki ‘Land Bank (thied bad pyllang jaka daka Sorkar) na ka bynta ki kam pynroi ka dei kaba mih lyngba kane ka Policy”.
U Bah Paul ula kular ruh “Ha kajuh ka por, lada donkam ban pynjanai bha ia ka Policy, nga sngew ba kane ka dei kaba lah ban leh ha kano kano ka por namar nga ngeit ha ka jingong “ Ka jaka kaba bun eh ha kane ka pyrthei ka dei ka jaka ban pynjanai. Kumta ngi lah ban pynjanai beit ia ka Policy”.
Halor ka jingtyrwa ba donkam ban iasyllok bad ki kynhun bapher bapher, u Myntri ula ong “Kane ruh ka lah ban iarap namar ym don satia kano kano ruh kaba la shu rai kut beit wat ka Riti Synshar ka Ri, kaba la kein kum kaba jrong tam ha ka pyrthei, ka dei kaba la pynkylla thymmai la palat 100 sien- Kumta kam don satia kano kano kaba la rai kut ha ka synshar khadar. Ta ka daw haba phai sha ka kam thw ain, kam ju don satia u full stop, ki don beit tang ki coma”.
Haba kylli halor ka jingsngew ba kan don ka jingknieh noh ia ka khyndew ka shyiap ki trai riewlum, u Bah Paul ula ong “Lada phi pule ia ka MEIPP, ki don ki bynta kiba iadei bad ka green economy, ka jingbhah kami a ki samla trai shnong hynrei ban shu ong beit beit ba kan don ka jingknieh noh ia ka hok halor ka khynew ka shyiap, kam long kaba dei. Ka jingthmu hangne ka long ba ka Sorkar ka dei ka trai jong ka jaka bad ia kane ka jaka kan shu aiwai sha ki kompani bapher bapher. Haba ngi ong kompani, nga sngew ba kala dei ka por ba ki briew jong ngi ki dei ban iasnohkti bad thaw ia ki kompani. Hangno ka don ka jingeh ban leh ia kata?.
Haba ai nuksa ia ka New Shillong Township Agency, ka MIDC, MTDC ba ki thied jaka bad ki jaka ki iai long ki nongynti ka Sorkar, u Myntri ula ong “Ka jingkylli ba kan duh noh ka hok halor ka khyndew ka shyiap kan nym mih satia”.
 ba kin ai jingmut lem sha ka rai jong ka Sorkar ban thied bad pyllang jaka (Land Bank) na ka bynta ki kam pynroi.){kind=link}