Shillong, Rymphang 28 : Kum shibynta jong ka ‘Viskit Bharat Modi ki Guarantee’, u President ka BJP Meghalaya Rikman G Momin ha ka sngi Balang, ula pyllait paidbah ia ka campaign ban kynthup lang ia ki jingai jingmut ki paidbah ha ka jingpynkreh ia ka manifesto elekshon Lok Sabha.
Ka jingthmu ba hakhmat eh jong ka campaign ka long ban lum ia ki jingai jingmut ki paidbah kiba lah ban long ki mat ba kongsan ha kaban lah pynlong ia ka Ri kaba roi ba par bad ia baroh ki nongshongshnong.
Hapoh kane ka campaign, ka party office ha manla ki mandal kan buh ia ki synduk ai jingmut ha kaba ki paid bah ki lah ban leit buh ia ki jingai jingmut jong ki halor ki policy bad ki mat kiba long kongsan na ka bynta ka jingkiew irat ka Ri bad ka roi ka par jong baroh ki nongshonghsnong.
Ka BJP kala khot ruh ia ki Sengbhalang, ki SHG, ki seng bapher bapher bad ki paidbah ba kin ai jingmut. Ka pyntip ba kito ki bym lah ban wan sha ophis ka party ki lah ban phah online lyngba ka NaMo app lane shu miss cal ha u nombor 9090902024.
Haba ai jingkren ha ka jingialang, u Rikman ula ong “Kum ka party, ka BJP ka ju ngeit ba ka synshar paidbah ka dei ka jingbahkhlieh jong baroh ki paidbah bad ka bor ban rai ia ki mat treikam kam dei ban shu long tang da ki katto katne ngut.
Ula ong ba da kane ka campaign, ka BJP ka thmu ban pynkhreh ia ka manifesto ka ban phalang ia ka jingmynjur lang jong ki nongshongshnong ka Ri.
