Shillong Nohprah 18: U Myntri Rangbah ka jylla Conrad K Sangma, hynne ka sngi u Blei ula pan iaka jingkyrshan na u Myntri Rangbah duh ka ri u Narendra Modi ban pynkylla iaka nongbah Shillong kum ka shlem jong ka pule puthi ka thaiñ shatei lam mihngi.
Haba kren haka jingialang kaba la iadonlang u Naredra Modi, u Myntri Kam Pohiing ka ri u Amit Shah, ki Myntri Rangbah bad ki Lat na ki 7 tylli ki jylla jongka ka thaiñ shatei lam mihngi ha ka jingrakhe Jubili Ksiar jong ka North Eastern Council (NEC) ha madan Polo, Shillong, u Conrad Sangma ula ong, “Katba ka sorkar ka jong nga ka dang trei shitom ban pynbit pynbiang ia ki jingtei bad ki jingdonkam jong ki jaka pule bad kumjuh ban pynkhlain ia ka jingnang jingstad jong ki nongshongshnong, nga kyrpad kyrpang ban ailem iaka jingkyrshan haka jingthmu ban pynlong iaka nongbah Shillong kum ka shlem jong ka pule puthi haka thaiñ shatei lam mihngi”.
Ula ong, ka sorkar ka don iaka jingthmu ban tei ia ki jingtei ki bapher bapher ha ka New Shillong Township kiba kynthup ia ki ophis sorkar, ki jaka pule, jaka ialehkai bad ki jaka sah bad kane kan iarap shibun ha kaban pynduna ne pynkhapngiah iaka sor Shillong bad kane kan iarap ruh ha ka ban lah ban wanrah biang iaka burom bad iaka jingitynnad ka jong ka.
U Conrad Sangma ula kyntu ruh ia u Myntri Rangbahduh ka ri ba un shah ban pynrung noh iaka ktien Khasi bad Garo haka khyrnit ba phra jong ka riti synshar ka ri.
Ula iathuh ruh baka sorkar MDA kala pynleit jingmut bha ha ki samla ka jylla bad ha kane ka bynta, ka sorkar kala ai jingkyrshan iaki nongtem bad ki nongrwai, ki nongseng kam lajong, ki kynhun jong ki samla lyngba ki skhim bapher bapher.
“Ka sorkar jong nga, ka pynleit jingmut bha ha ki samla kiba don bun bha haka jingdon u paidbah haka jylla. Ngi kyrshan ia ki nongtem, nongrwai, nongsengkam lajong, ki kynhun jong ki samla, ki nongialehkai lyngba ki skhim khnang ba kin lah ban kamai jakpoh bad ban plie ia ki lad ki lynti na ka bynta ka jong ki” ong u Conrad.
Ula pynpaw ba lyngba ka jingtrei khlem da shongthait jong baroh kiba don bynta lang, ka jylla kala kiew shaphrang bad kylla long ruh kum ka jylla kaba la kiew shaphrang hapoh ka ri ha kine ki 5 snem.
“Ngi la ioh pdiang iaka khusnam naka United Nations ba wanrah iaka jingkylla haka jingai jing synshar lyngba ki kor teknoloji bad ban kyntiew iaki kam jngohkai ha ki thaiñ nongkyndong. Ngi la ioh ruh iaka jingithuh kum ka jylla kaba la treikam bha ha ka jingpyntreikam iaka Jal Jeevan Mission, PMGSY, MGNREGS bad kiwei kiwei ki skhim kiba iadei bad ka koit ka khiah. Ngi la wan ruh haka kyrdan kumka jylla kabala treikam bha ryngkat bad ka Gujarat bad Karnataka haka National Startup Ranking Framework 2021” ong u Conrad.
Ula pyntip baka sorkar ha kine ki 5 snem kala lah ruh ban pyndep ia ki projek kiba la sahteng bad kala jan dep ruh ha kaban tei pyndep ia ki projek kiba heh, kiba kynthup iaka 5-Star Hotel kaba nyngkong ha ka jylla ka Taj Vivanta, Marriott Hotel bad ka Ganol Hydroelectric Power Project bad ban shna pyndep iaka Football Stadium kaba heh da kaba pyndonkam da ki kor teknolji ha ka P.A. Sangma Sports Complex.
Kiwei pat ki projek kibaheh kiba la pyndep ha kine ki 5 snem ki kynthup iaka
Shillong International Centre for Performing Arts & Culture (SICPAC), ka Shillong IT Park bad ka Shillong-Diengpasoh Road.
