Shillong Lber 20: Ka kyrtong MP ka National People’s Party na Shillong Lok Sabha constituency Dr. M. Ampareen Lyngdoh kala ong ba kan long kum ka jingkieng ban pun hapdeng ki jaidbynriew Pnar bad ki nongialam ha Delhi bad ban pynsngew iaka jingsngewkhia jongki paidbah ha Lok Sabha.
Haba kren ha ka jingialap elekshon ha Jalaphet, East Jaintia Hills ryngkat bad u Symbud Myntri Rangbah ka jylla u Sniawbhalang Dhar, ka kong Ampareen kala ong “Ngan trei ryngkat bad ki Dolloi bad ki Waheh Chnong ban sngewthuh ia ka jingeh ka jongki bad ban rah hapoh ka Parliament”.
Ka Kong Ampareen kala leit ruh ban iakynduh ia ki nongialam jongka NPP Sutnga Saipung Block.
“Nga pynpaw ka jngsngewnguh ia ka seng kaba la jied ia ka longkmie bad ia ki paidbah kiba la jied ia MLA kynthei na Saipung Constituency ban pynpaw ia ka sur jongu paidbah hapoh ka iingdorbar thawain ka jylla” kala ong bad ka bynrap ba ka NPP kala ai bynta bha ia ki kynthei ban long ki nongialam na ka bynta ban shimkhia ia ki jingeh kiba mad da ki paidbah ka jylla.
“Kala dei ka por ia ki paidbah jongka Sutnga Saipung ban jied sa iaka longkmie ba kan long ka MP ka jongki”.
U Bah Sniawbhalang Dhar ula pynshai ba ka jingjied ka NPP ban pynieng da ka kynthei ha ka elekshon MP kadei namar ba kade ika kmie kaba don jingkitkhlieh ym tang iala ka iing hynrei iaka constituency ruh baroh kawei.
Ula kynthoh ruh iaka seng VPP kaba pyrshang ban kynnoh ba ka sorkar MDA kadei kaba bamsap bad ula ong, “Lada ki jngkynnoh ki long kiba shisha, balei pat ki paidbah kin dang shaniah bad ai jingkyrshan biang ia ka NPP ban synshar biang”.
Ula ong ba ka Dr. Ampareen kadei ka kyrtong kaba biang tam ban mihkhmat ia ka Shillong ha ka Lok Sabha bad ula pynpaw ba kan mihkhmat na ka bynta ka jingangnud jong ki lak ngut ki paidbah jong ka constituency.
Ka Dr. Ampareen kala ai jingkre nruh ha ka jingialang kaba la long ha Khliehriat West Community Hall hynne ka sngi bad kala pan ia ka jingkyrshan na ki paidbah.
Kiwei kiwei kiba la iadonlang ha ka jingialang ki kynthup ia ka MLA ka Sutnga Saipung ka Kong Santa Mary Shylla, u MLA ka Jowai u Bah Wailadmiki Shylla, ki MDC ka NPP ha ka JHADC bad kiwei kiwei.
Ka Dr. Ampareen kala kyntu ia ki paidbah ba kidei ban iatylli kawei hapoh ka lama jong ka NPP bad ban pyni sha ka ri India baroh kawei ba ka Meghalaya ka ngeit ha ka jingialam jong ki kynthei.
“Baroh kiba don ha ka imlang sahlang, ki kynthei, ki samla, ki nongialam shnong bad ki nongialam kidei ban wanlang hajuh ban phah ia ka khubor kaba shai bad kaba sawa jam da kaba jied ia ka longkmie ban mihkhmat ia ki sha ka Lok Sabha,” la ong ka Kong Ampareen.
