Shillong, Lber 28 : U Myntri Rangbah ka Jylla Conrad K Sangma, ula pynpaw ba ka tnad Bording bad ka Meghalaya Energy Corporation Limited (MeECL) ki dei kawei na ki jingtynjuh kaba khaw eh ba ka Sorkar ka iakynduh namar ka jingbun ki jingeh, khamtam ka jingshim ram.
Hynrei ula pynpaw pat ia ka jingkyrmen ba ka NTPC ka lah ban pynduna ia ka sut jong katto katne ka ram hadien ka jingwan jong u na New Delhi bad jingiakynduh ia u Myntri ka Power Ministry, ki Heh ka Power Ministry bad ki Heh ka NTPC.
Ha kane ka jingleit Delhi, u Conrad ula iakren bad ka Sorkar India, ki Agency bapher bapher ka Sorkar Pdeng bad ki kompani kum ka NTPC bad NHPC. Ka jingiakren ka la pynleit jingmut eh halor ka jingpynbeit ia ki mat ba sahteng kiban lam sha ka jingkham biang ka pla tyngka jong ka MeECL.
Ka MeECL kala shim bun tylli ki ram na ka NHPC, ha kaba katto katne ki dei ha ka sut kaba heh, ia kaba la iakren ban pynbeit ne pynduna. Haba iadei bad ka NTPC, ha ka por ba iasoi ia ka soskular la bun snem mynta, ka Sorkar Meghalaya kala iakren bad ka NTPC kumno ban don ka jingiasngewthuh jingmut halor ki jingeh kiba mih bad kumno ban lah pynbeit noh ia ki.
“Ka jingleit Delhi jong ngi ka long ban pan ia ka jingkyrshan na u Myntri bad wad ia ka lad ka lynti kaba ngin lah ban jam shakhmat kum ka nuksa, ka NHPC, ngi don shibun ki ram bala shim. Namar kata,ngi la iakren bad shong jingialang ruh bad ka NHPC ha ka jingiadon ryngkat u Myntri ban iapyrkhat la ka long ne em kaba lah ban pynduna ia ka sut” ong u Conrad.
