Shillong, Naiwieng 14: U Symbud Myntri Rangbah ka jylla Bah Prestone Tynsong ula pyntip ba dang shen ula leit iakynduh ia u Taj Hassan, Director General ka Tnad Fire Services, Civil Defense & Home Guards jong ka Ministry of Home Affairs ban kyrshan lem iaka jylla Meghalaya ha kaban pynbha, pynkhlain bad ban pynjanai ia ka Fire Services ha ka jylla baroh kawei.
U Bah Prestone Tynsong ula ong ba ka sorkar jylla kala aiti iaka jingtyrwa ha u Taj Hassan khamtam hadien ba ka jylla kala sakhi iaka jingpluh hapoh Police Bazaar bad ka sorkar ka kwah ban pynkhlain bad ban pyndonkam da ki tiar ki tar katkum ka juk kaba mynta.
“Ngi la pynsngew iaka jingdonkam ka jylla Meghalaya ban pynbha, pynkhlain bad ban pynjanai ia ka Fire Services ha ka jylla baroh kawei da kaba pyndonkam da ki tiar ki tar katkum ka juk kaba mynta kaban kot T.44 Klur bad na ka liang u Director General yn sa pyniaid shakhmat ia katei ka jingtyrwa” ong u Bah Prestone.
Ula ong, ba ka sorkar ka don ruh ia ka jingthmu ban pyndonkam noh da ki kali pynlip ding kiba kham rit bad ban don ruh ia ki pipe um kiba jrong ban ioh pyndonkam ha ki jaka kaba ka kali kam lait ban iaid.
U Bah Prestone Tynsong ula iathuh ba ha ka jinglei tDelhi ka jong u, ula leit ban iakynduh ia u Secretary ka Ministry of DONER u Chanchal Kumar, ha kaba iadeibad ki scheme bad ki project kiba la pyntreikam ha ka jylla Meghalaya.
“Ki don ki project kiba ngi lah dep kum ka Science and Commerce College ha Mawphlang hynrei ki Kontraktor kila hap sangeh ka jingtreikam namarka jingbym ioh ia ka pisa, kumta ngi la pynsngew ia katei ka mat bad kiwei kiwei ki projek shna surok kaba ka jylla kam pat shim la ioh satia iaka pisa ha ka wat ka baar ne balai bad na ka liang u Secretary ula mynjur ban pyllait noh ia katei ka pisa kat kaba dei sha ka jylla Meghalaya” ong u Bah Prestone.
