Shillong, K’lyngkot 16 : Ka Sorkar Jylla kala pynpaw ia ka jinglong ba kloi ban shong bishar ia ki kam jong ki nonghikai ba ngat ‘dak thohbria’ ha ka thungkam Assistant Teacher ki skul Lower Primary u snem 2008, ong u Myntri Rangbah Conrad K Sangma ha ka sngi Thohdieng.
Haba iakren bad ki nongthoh khubor, u Conrad ula ong ba ka Sorkar kala pan ia ka rai na ka Iingkashari Supreme Court lane High Court ban shong bishar biang ia kane ka case.
“Ngi la pan na ka Supreme Court lane High Court ba kin ai ha ngi ia ka rai lane ka jingbit la ngi lah ne em ban bishar biang ia kane ka kam bad ngin da kmen shibun ban bishar thymmai ia ka. Lada don ki case kiba dei hok bad lada don ki briew kiba shah ktah namar ka jingbym dei, khlem pep ngi kwah ban shong bishar ia kata” ula ong.
U Myntri Rangbah ula kren ia kane haba jubab ia ka jingkylli halor ka jinglong jingman ki nonghikai ba shah pynngat dak thohbriew hadien ka hukum ka Iingkashari Meghalaya High Court ba 4 tarik Nailur 2025, kaba pyniap noh ia ki jingkynnoh pyrshah ia ka Myntri barim ka tnad Pule Puthi Kong Ampareen Lyngdoh, u Director barim ka Elementary and Mass Education JD Sangma bad Deputy Director barim Ameka I Lyngdoh.
U Myntri Rangbah ula kular ba ka Sorkar kala iakren bad kine ki nonghikai bad kala pynkhreh ia ki lad ki lynti ban jam shakhmat.
“Nga la bthah ia u Chief Secretary ban shong bishar ia ki lad ki lynti bad u dang leh mynta ia kae ka kam bad ban khmih kumno ngin pyniaid shakhmat ia ka kam” bynrap u Conrad.
Nalor kane, u Conrad ula pyntip ba ki don kumba 140 ngut ki nonghikai kiba la dep ban thungkam ha ki por bala leit.
“Lada phi kynmaw, man ka por ba ka Supreme Court lane High Court ki ai ka lad ia ngi ban shong bishar, ngi la shong bishar. Kumba 140 ngut ki nonghikai lah thungkam biang ha ka sien bishar ba nyngkong hadien ba ngi shem ba kim shym la donkti ha kane ka kam” ula ong.
