Shillong, K’lyngkot 24 : U Myntri ka Tnad Pule Puthi Rakkam A Sangma ha ka sngi Thohdieng, ula pyntip ba ka Tnad Pule Puthi kala thoh sha ka Sorkar Jylla ba kan ai jaka lem na ka bynta ban tei ia ka Shillong Campus jong ka Captain Williamson Sangma State University.
Haba iakren bad ki nongthoh khubor, u Rakkam ula ong ba ka Sorkar Jylla kala dep pynbna lypa ban buh ia ka Shillong Campus jong ka State University bad kane ka kam kala don ha ka jingpynkhreh pynkhrum.
U pyntip ba ka Tnad mynta ka dang wad ia ka Campus ba shipor ba kan lah ban ai noh ia ka jingshakri ia ki samla pule eka Ri-lum Khasi bad Jaintia.
“Ngi la phaikhmat sha ka jaka bad khmih ia ka NIT Campus namar la dep pynkynriah ia ka nangtei hynrei namar ba ka dei jong ka NEHU, ngi la phaikhmat sha kane ka jaka kum ka Campus ba shipor” ula ong.
U Rakkam ula pyntip “Hynrei ia ka Campus ba shirta ha Shillong, ngi dang wad ia ka jaka. Ngi la thoh sha ka Sorkar ba kan ai jaka lem na ka Tnad pynroi sor ban buh ia kane ka campus ha Shillong”.
Halor ka jingkynnoh ba shu pynbor ia ki College ban pyniasoh bad ka State University, u Myntri ula ong ba ka jingkylli ba ngi shu pynbor kam mih satia.
“U Myntri Rangbah ula dep kren shai ba kan dei ka mon jong ki jaka pule ka Jylla la ki kwah pyniasoh bad ka State University ne bad ka NEHU” ula ong.
U pyntip ba ka University kala dep thoh sha baroh ki College ban iakren bad iashim rai halor kane ka kam.
U Rakkam ula pynpaw ba ka jingthmu haba wanrah ia kane ka State University ka dei eh na ka bynta ka jingsuk jong ki samla pule namar ha ki Central University ki don katto katne ki rule kiba donkam ban hap bud bad hateng hateng ki long kiba eh ia ki jaka pule ban pyntreikam ia ki.
Ula ai nuksa ia ka jingjia haba ka Sorkar kala hap ban thoh sha ka Sorkar Pdeng ban pyllait ia ka Jylla na ka eksam Common University Entrance Test (CUET).
“Hynrei kam bha satia ban shu iai phah pyllait biang na ka por sha ka por hynrei ngi hap ban wad ia ka lad ka lynti kaban long shirta. Kumta, ka dei ka State University bad ngin iaid kat kum ki Rule ka Jylla bad ka calendar kan iaid hi kat kum ki kyndon ka UGC hynrei ia ka jingpynrung klas bad kiwei kiwei ki jingdonkam, kin iaid kat kum ki rule ka Jylla” ong u Rakkam.
Haba kylli, u Rakkam ula pyntip ba katto katne ki College kila phah ia ki aplikeshon ba pynpaw ia ka jingkloi ban iasoh hynrei ka long pat kaba donkam ban hap bud ia ki lynti treikam.
