Pan da ka RTI, ong u CM ba duna ki kam pynroi ha ki constituency ki MLA ka Liang Pyrshah

Shillong, Naiwieng 13 : U Myntri Rangbah ka Jylla Conrad K Sangma ha ka sngi Palei, ula kyntu ia ki paidbah ba kin pyndonkam da ka Right To Information (RTI) ban shem la ki skhim MLA bad MP ki dei kiba la pyntreikam hok ha ki constituency ba bat da ki seng sain pyrthei ba don ha ka Liang Pyrshah kiba kam ba duna ki kam pynroi ha ki jaka jong ki.

“Don ki por haba nga khmih ia ki constituency bapher bapher, khamtam ha ki jaka jong ki Liang Pyrshah, ka roi ka par ka duna bha. Nga artatien la ki MLA ki pyntreikam hok ne em ia ki skhim MLA ha ki constituency jong ki” ong u Conrad haba kren ha ka jingpdiang burom ia u MLA barim ka Nongkrem Bah Lambor Malngiang, uba la wan pyniasoh sha ka NPP ha ka sngi Palei.

U Conrad ula kyntu ia ki nongshongshnong jong ki constituency ki Liang Pyrshah ba kin pan jingtip da ka RTI.

“Nga kyrmen ba ki paidbah jong kito ki jaka kin mih shakhmat bad pan RTI bad ban wad kumno ki MLA ki pyndonkam hok ne em ia ki MLA skhim, kumno u MP u pyndonkam hok ne em ia ki skhim. Sngewbha ia pan RTI bad wad ia ka jingshisha” ula kyntu.

Ula ban jur ia ka jingbym don ka jingiatreilang na ki katto katne ki MLA ka Liang Pyrshah haba pynpaw ba ki don katto katne ki seng sain pyrthei kiba kyntait wat ban iakynduh ne kren ia u Myntri Rangbah, kaba ktah jur ia ka jingpyrshang ban theh ia ki kam pynroi.

“Ha ka synshar khadar, ki don beit ki Liang Pyrshah bad ki don beit ki Liang Synshar, hynrei na ka bynta ka roi ka par jong ki briew jong ngi, wat ki MLA ka Liang Pyrshah….ki donkam ia ka jingiarap jong ka Sorkar…kane ka dei ka rukom treikam ka riti synshar paidbah, kane ka dei ka rukom treikam ka synshar khadar” bynrap u Conrad.

Ula kdew ruh ba ki Nongmihkhmat paidbah kiba khein sting ia la kam kamram, ki dei ban kitkhlieh iala ki jong ki nongthep vote bad katba ka Sorkar ka dang pyrshang ban pyniaid shakhmat ia ka roi ka par, ka jingbym don ka jingiatreilang kala pyndkoh ia kiei kiei baroh.