Shillong, Lber 17 : U Myntri ka Tnad Food and Civil Supply Bah Methodius Dkhar ula iathuh ba ka Jylla kala pan kham bun ka bhah LPG naka Sorkar Pdeng, haba kdew ia ka jingkiew ki kam jngohkai ha Jylla bad ka jingduna ki commercial cylinder na ka bynta ki hotel.
“Ngi la kren ia ka Ministry ba dei khmih namar ka Meghalaya ka dei kawei na ki jaka shangkai pyrthei bad ngi donkam kham bun ki commercial LPG” ong u Bah Dkhar.
“Kila pyrshang ban pynioh kham bun na ka bynta jong ngi, hynrei kim pat lah ban kular 100% ia ngi ba kin ai” ula ong haba bynrap ba ki domestic cylinder kim shym la shah ktah satia.
“Ngi la iashong pyrkhat halor ka jinglong jingman bad ngi la pynleit jingmut tang ha ka jingpoi ia ki domestic cylinder ban pynthikna ba kam dei ban don ka jingduna” ula ong.
Kat kum ka jingpyntip ba khatduh ka Tnad, ka stock jong ka domestic LPG ka dang pahuh tad haduh ka 31 tarik Lber,
“Ka jingsam ia ki commercial LPG lah shu leh da kaba jied ia kiba donkam hakhmat eh ba kynthup ia ki skul, ki hospital bad ki anganwadi. Ki hotel kin hap ban pyniaid hi ia katto katne por” ong u Bah Dkhar haba pynpaw ba ka don ka jingduna khyndiat ha ki commercial LPG hangne hangtai.
