Nongstoiñ, Risaw 17: Ka ophis jong ka District Sport Officer ha ryngkat bad ka District Sport Promotion Society West Khasi Hills, ka la pynlong hynne ka step ïa ka jingïakop mareh ne ka “Fit India Freedom Run 3.0” kaba 8.7 kilometer, kum ka dak ka jingrakhe ïa ka Azadi Ka Amrit Mahotsav (AKAM) halor ka phang ‘Azadi Ke 75 Saal, fitness rahe bemisaal’.
Ha kane ka jingïamareh, la wan ban ïa shim bynta da kumba 100 ngut ki shynrang bad kynthei kiba na jan bad na jngai ka sor Nongstoiñ ban ïoh ïa ka met kaba koit ba khiah krat.
Ïa kane ka jingpynïamareh, la kaweh lama da u Deputy Commissioner ka West Khasi Hills District bah Garod LSN Dykes IAS, kaba la sdang na phyllaw ka ophis DC shaduh Nondeiñ bad ban pynkut biang ha DC ophis.
Ha kane ka jingkaweh lama la ïa don lang ka kong B.Syiem District Sport Officer, ki coach bad nongtrei na ka Sport Departments.
La pynkut ïa kane ka jingpynïamareh da ka jingsam ïa ki khusnam kaba long da ka khusnam pisa bad syrnod sha ki nongjop shynrang bad kynthei.
Ïa ka khusnam ba nyngkong jong ki shynrang la ïoh ban rah da u Benedict Kharbani, ba ar da u Nickyson Nongkseh bad ba lai sha u Selestin Tympuiñ. Na ka liang ki kynthei, ka Pynhunlang Puweiñ ka la ïoh ïa ka khusnam ba nyngkong, ka Jidalin Tympuiñ khusnam ba ar bad Inocensia Tympuiñ khusnam ba lai.
