Shillong, Nailar 08: Kumba 98 tylli ki shnong kiba hap hapoh ka North Garo Hills District, ki la shah pynkup burom kum ki shnong kiba lait na ka jingpang TB 2023.
Ia kane ka prokram pynkup burom la pynlong da u District Tuberculosis Officer, u William Nagar ha Mendipathar Multipurpose Cooperative Hall, Resubelpara, North Garo Hills.
La ithuh ia ki shnong katkum ki 6 tylli ki dak ba la buh hapoh ka prokram National Tuberculosis Elimination Programme (NTEP) ban pynduh ia ka jingpang TB bad ban ioh ia ka jinglait na ka jingpang TB ha u snem 2025.
Iaki 98 tylli ki shnong na ki 11 tylli ki PHC jong ka North Garo Hills district la sam ïa ki syrnod bad u bronze statue jong u Mahatma Gandhi ban kynmaw burom ïa ka jingïohi jngai jong u sha ki shnong kiba koit ba khiah.
La pyntip ha kane ka prokram ba kine ki shnong kiba la pynneh ia ka kyrdan ba lait na ka jingpang TB haduh 2 snem kin ioh da u Silver Statue jong u Mahatma Gandhi bad u Golden Statue na ka bynta ban pynneh ia ka kyrdan ba lait na ka jingpang TB hadien ki 3 snem ban wan.
Haba kren ha kane ka sngi u Deputy Commissioner ka NGH u AK Singh u la ai ka jingïaroh ïa ka tnad ka koit ka khiah bad ïa ki nongshimkhia halor ka jingïadon bynta lang jong ki sha ka jingpynduh ïa ka jingpang TB.
U DC ula kyntu ban don ka jingiatreilang jong ki nongtrei ka koit ka khiah bad ka imlang sahlang na ka bynta ban ioh ia ka jinglong shnong kaba lait na ka jingpang TB baroh kawei.
Ka Ophisar jong ka District Tuberculosis na ka bynta ka East & North Garo Hills, ka Dr Chrissie Pearly M Sangma ka la pynpaw halor ki 6 tylli ki dak na ka bynta ka jinglong shnong kaba lait na ka jingpang TB bad bynrap ba man la ka shnong ka dei ban bud ryntih ïa ki dak bad ban kular ban pynduh jait ïa ka jingpang TB.
“Ka jingpang TB ka long kaba pyniap briew hynrei da ka jingsumar kaba biang bad ka jingkyrshan kaba don akor ia u nongpang, ka jingpang ka long kaba lah ban koit”, la ong ka Dr CP Sangma.
La ai khublei ruh ïa ki Ni-kshay mitras ne ki nongnoh synñiang hapoh ka Ni-kshay Poshan Yojana kiba la ai mon sngewbha da ka jingkyrshan pisa ïa ki nongpang TB.
