Shillong, March 17: Ki kolshor kiba riewspah bad ki jaka kiba itynnad, naduh ki tamasa tynrai haduh ki jingbam bad ki tiar thain tynrai, mynta kila kylla long shi bynta jongka Digital Archive jong ka ri, ha kaba haduh 7,012 tylli ki shnong jong ka jylla kila shah pynrung ha ka map hapoh jongka “Mera Gaon Meri Dharohar” (MGMD) Programme.
Kane ka sienjam kadei ka bynta kaba kongsan jongka National Mission on Cultural Mapping (NMCM) hapoh jongka Union Ministry of Culture, ia kaba mynta kala dep pynrung ha ki kot ki sla kiba iadei bad ka kolshor ia palat 6.23 lak tylli ki shnong ha kylleng ka ri India, da kaba tahw ia kawei na kiba heh tam ka jinghiar pateng ha ki shnong ki thaw.
Ia kane la pyntreikam da ka Indira Gandhi National Centre for the Arts, da ka mishon ban pynneh ia ka kolshor kaba iar ryngkat bad ka jingwad ia ki lad ban kyrshan ia ka kamai kajih ha ki thain nongkyndong.
Lyngba ka MGMD Portal, ki shnong ha kylleng jong ka Meghalaya kidei kiba la pynwandur ryngkat bad ki kolshor ki jongki. Kiba kynthup ia ki jaka kiba naduh hyndai hynthai, ka jingdon ia ka histori, ki jinglehkmen bad ki tamasa kiba long kyrpang ia ki jaidbynriew riewlum, ka rukom ohdur bad rukom thain kti tynrai, ki jingbam tynrai, ka riam ka beit bad ki jingdeng tynrai, ka ktien ka thylliej, ka jingngeit, ka riti dustur, ka jingtip shaphang ki nongoh dur kiba pawkhmat bad ki riewshimet bad ka jinglong jingman jong ka jaka bad ki jingtip shaphang ka roi ka par.
Ki ophisar kila pynpaw ba kane ka jingpynwandur ia ki jingtip, kala iarap ha kaban pynman ia ka jingshisha ia ki shnong, ki kolshor tynrai, kiba lah ban kyrshan ia ka jingpynwandur ia ka kam jngohkai, ka pule puthi bad ki kam pynroi ha ki shnong.
Ka MGMD Programme ka lam sha kaban pynkhlain ia ka jinglong tynrai jong ki shnong da kaba pynman ia ka jingshisha ha ki shnong, ka kolshor kaba ithuh ia ki jingleh tynrai ha ki shnong bad ki jingdon jingem kiba reiewspah kiba la hiar pateng. Ka jingdon ia ki jingtip kiba paka hapoh jong kawei ka National Portal kan kyrshan ia ka jingpynwandur ia ka kam jngohkai ha nongkyndong bad ki skul, kumta kan noh synniang ha kaban pynneh pynsah ia ka kamai kajih na ka bynta ki pateng ban dang wan bad ban kyntiew ia ka ioh ka kot ha ki thain nongkyndong.
Ki ophisar kila ong, ba ka MGMD Programme kam don ia kino kino ki kyndon ba ka jingpynrung ia ki jingtip kiba pura ha ka map kan long kaba ai jingmyntoi beit beit ia ki nongohdur ne nongthain kti ne ki jaka treikam.
 Programme.){kind=link}