Shillong, Rymphang 28 : Haduh 55,189 ngut ki khynnah kin iakhun ia ka eksam Secondary School Leaving Certificate (SSLC) bad 34,335 ngut kin iakhun ia ka Higher Secondary School Leaving Certificate (HSSLC) ka ban sdang naduh ka 1 tarik Lber bad 4 tarik Lber.
Haba pyntip ia kane hynne ka sngi Balang, u Myntri ka Tnad pule puthi Rakkam A Sangma ula ai ka jingkhublei kitbok ia baroh ki khynnah pule, ki ban iakhun ia kine ki eksam bala pynlong da ka Meghalaya Board of School Education.
“Kane ka eksam kan wanrah ia ka jingkylla ha ka lynti iaid jong ka jingim jong phi bad ka long kaba kongsan bha ia phi iwei pa iwei. Kumta, nga kyrpad ia baroh ki khynnah ba kin leh bha, pynleit jingmut bad pynduna ia ka por ha ki mobile….sngewbha pyn sarong ia ka jaka pule, ialade, ia ka shnong ka thaw bad ki kmie ki kpa da kaba wan bha shakhmat” ula ong.
Ki don haduh 108 tylli ki centre ia ka HSSLC eksam bad 159 tylli ki SSLC ha baroh ki 12 tylli ki District ka Jylla.
“Ngi la shim ia baroh ki lad ki lynti ban pynthikna ba kine ki eksam kin long kiba iaid beit iaid ryntih” ula ong.
