Shillong, Risaw 28: U Myntri Rangbahduh ka ri u Narendra Modi un sam palat 51,000 tylli ki shithi thungkam sha ki samla kiba dang rung kam thymmai ha ka sngi Baar, ha ka por 10:30 mynstep lyngba ka video conferencing.
Ha ka jylla Meghalaya, u Myntri Khynnah jong ka sorkar pdeng uba khmih ia ka Tnad External Affairs and Textile u Pabitra Margherita un iashimbynta ha ka Rozgar Mela ban long ha State Convention Centre, Shillong ha ka sngi Baar bad ia kane ka prokram yn pyniaid da ka Tnad Posts, NE Circle, Shillong.
Ka Rozgar Mela ka pyni ia ka jingkut jingmut u Myntri Rangbahduh ka ri ban peit bniah ia ka jingpynmih lad ioh kam bad kan pynkupbor ia ki samla lyngba ka jingplie ki lad ba bit ba biang ban noh synniang sha ka jingtei ia ka ri.
Ia ka Rozgar Mela yn pynlong ha 40 tylli ki jaka ha kylleng ka ri, ha kaba ki samla ba dang rung kam thymmai ki iasoh bad ka sorkar pdeng ha ki Tnad treikam bapher bapher, kum ka Tnad Revenue, Higher Education, Kam Pohiing, Kam Iada ri, ka koit ka khiah bad kiwei kiwei ki tnad.
Ki samla ba dang rung kam thymmai ki ioh lad ruh ban hikai pyntbit ialade lyngba ka ‘Karmayogi Prarambh,’ ka online module ha ka rynsan iGOTKarmayogi. La pynbiang palat 1400 ki lad ioh jinghikai e-learning ka ban pyntbit ia ki samla ha ki kam jong ki bad ban trei ban tei ia ka Viksit Bharat.
