Shillong, Nailar 25 : Ka Sorkar Jylla ha ka sngi Ba-ar kala pyntip ba kala pynlong ia palar 69,000 tylli ki social audit ha u snem bala lah, kaba long ia palat 4.19 lak ki audit ha ka phra snem.
U Myntri Rangbah Conrad K Sangma ula pyntip ha Iingdorbar Thaw Ain ba 7,724 ki jingbym biang la pyntip ha kine ki lai snem bala leit noh, ha kaba 724 tylli la lah ban pynbeit ia kaba la buh ha ka rynsan paidbah ia ka action taken report ne ka kaiphod ba pyni ia ki kam bala leh.
Haba jubab bynrap, u Conrad ula iathuh ba ka Jylla kala iaid palat ia ka jingbuh ka Sorkar Pdeng da kaba pynlong ain ia ka Meghalaya Community Participation and Social Audit ha u snem 2017.
“Kaei kaba sdang da ka MGNREGS hapoh ka MSAT (Meghalaya Society for Social Audit and Transparency) mynta kala kynthup lang sa 13 tylli ki skhim- kynthup ka food and civil supplies, education, POSHAN, fisheries’ Blue Revolution, power bad health” ula ong.
U iathuh ba ia ka kaiphod la phah sha ki tnad ba dei khmih ba kin leh eiei pyrshah ia ki agency ba pyntreikam bad 1,491 tylli ki report lah dep ban thep online.
“Ngi buh ia ka mang tyngka ba jan kot T. 5 klur man u snem na la ka jong ka pla tyngka ban leh ia kane” ong u CM.
U Nongialam ka Liang Pyrshah Mukul Sangma, ula ong ba kane ka Ain, kaba la mynjur ha ka por jong u, kala ioh ia ka jingiaroh hapoh ka Ri baroh kawei kaba long kum ka nuksa ia ka jingtreikam kaba shai lyngba ka jingiashim bynta lang ki shnong ki thaw haba ong pat hynrei ka long kaba donkam ban don ka jingpynbeit haba iohi ia ki jingduna.
Shuwa kane, u Myntri ka Tnad C&RD Bah Sosthenes Sohtun ula pyntip ba 17 tylli ki skhim ki dang don mynta hapoh ka audit bad la lap ia saw tylli ki case ba pyndonkam bakla ia ka pisa, hynrei ia ka jingtip ba bniah, yn donkam ban wanrah la ka jong ka notice, kaba pynlong ia u MLA ka VPP Ardent Basaiawmoit ban kynnoh ba u Myntri ula wan khlem pynkhreh.
