Shillong, Risaw 04: Palat 10,000 ki kali saw shaka bad 17,000 tylli ki ar shaka kila aplai ban ioh ia ka Registration ha ka jylla tang ha u snem 2023.
Ia katei la pyntip da ka Tnad Transport ha ka jingialang kaba la lum da u Chairman ka Meghalaya State Planning Board (MSPB) Bah Metbah Lyngdoh hynne ka sngi Thohdieng.
U Commissioner & Secretary ka PWD kynthup ka NHIDCL bad ka Transport, kila ai iaka jingtip bad ka jingbatai kaba bniah sha ki dkhot jong ka Board bad haka jingialang la pyntip ba ka East Khasi Hills District ka dei kaba bun tam haka jingrejistar ia ki kali.
“Nalor kane, la sakhi ruh ha ka jylla la rejistar haduh 10,000 tylli ki kali saw shaka bad palat 17,000 tylli ki ar shaka ha u 2023 bad ka long kaei kaei kaba sngewkhia bha” ong u Bah John F Kharshiing u dkhot jong ka Board.
Ula ong ba ka jingialang kala ai jingmut ia ka jingdonkam ban pynduna ba kawei ka longing ka dei ban don tang 2 tylli ki kali kumba la leh ha kiwei pat ki ri bad ban sdang ruh iaka Odd-Even System ha ki jaka kiba khapngiah bad ban don ia ki jaka pynieng kali kaba biang haba thied ia ki kali.
Nalor kane, ka jingialang kala ai jingmut ruh ia ka jingdonkam ban don ia kiba kum ka ISBT ha ki jaka kiba don ha khapsor khnang ba ki kali kin ym leit lut baroh sha Shillong.
Kala banjur ruh ban don noh ia ki Online Taxi, ki jaka kyntiew bad jaa pynhiar ia ki nongleit nongwan bad kila iatai ruh ha kaba iadei bad ka jingduna ki pulit Traffic hapoh ka nongbah.
Ha kawei pat ka liang, ka Board kala rai ban khmih bniah ia ka jingpyni bad jingbatai bniah jong ka tnad Urban, PWD, Transport bad Police hashwa ba kan shim ia ki lad ki lynti ban ai iaki jingbthah sha ka sorkar jylla ban shimkhia ha kaban weng ia ka jingeh na ka jingkhapngiah ha nongbah Shillong.
Ha kane ka jingialang, ka PWD kala pyntip ruh ia ka jingtjmu ban shna ia ki surok Highway ha Umshyrpi kynthup ia ka Flyovers shaduh sha Barik.
