Shillong, Jymmang 21: Plat 1,300 ngut ki samla pule kila rung hapoh jongka North Eastern Council’s Youth and Science Outreach 2025-26, katba ka Council ka dang pyniar ia ki ar tylli ki sienjam treikam ki jongka kaba kynthup ia ka Ashtalakshmi Youth Exchange Programme bad ka NE-SPARKS.
Ka Ashtalakshmi Youth Exchange Programme kala sakhi ia ka jingdon 581 ngut ki samla pule na ki Skulbah bad ki College ha kylleng jong ka ri kiba wan sha ka thain shatei lammihngi ban jngoh ia ki jaka pule kiba donnam ha ka thain shatei lammihngi.
Napdeng kitei, 44 ngut ki samla pule na Delhi bad Odisha kila wan jngoh ia ka IIM-Shillong kum shi bynta jong katei ka prokram ban iasam mar kylliang ia ki jingtip.
Ka NEC kala ong, ba ka prokram kadei shi bynta jongka jingiohi jngai ban pynkhlain ia ka roi ka par jong ki samla bad ki sienjam kiba iadei bad ka lain Science, ha ryngkat bad ka saindur ia ka jingpyninam mar kylliang ia ka kolshor jongki.
Katba ka NE-SPARKS — North East Students’ Programme for Awareness, Reach and Knowledge on Space, kala ai ia ki 786 ngut ki khynnah skul na ki 8 tylli ki jylla ka thain shatei lammihngi ia ka lad ban leit jngohkai ia ka Indian Space Research Organisation (ISRO) ha u snem 2025-26.
Ha kane ka thup kila don 99 ngut ki khynnah pule na jylla Meghalaya.
“Kane ka jingleit jngoh kadei kaba la pynwandur ban kyntiew ia ka jingioh ia ka jingpynsngewthuh kaba kham bha ia ka Science bad ban pynshlur ia ki jingmut jingpyrkhat jongki khynnah ban leh ia kiei kiei kiba long thymmai bad ha kaba iadei bad ka Space Science,” la pynpaw ka NEC.
