Shillong, Nailur 04 : Haduh 11,672 ngut ki nongiakop mareh kila iashimbynta ha ka 5th Sohra International Half Marathon 2026 ba long ha ka sngi Thohdieng-kaba la nang pynkhlain ia ka jingpyrshang ka Meghalaya ban paw kum ka jaka ialehkai, ong ka Tnad Sports & Youth Affairs.
Ia kane ka marathon la pynlong da ka Meghalaya State Olympic Association (MSOA) ha ryngkat ka jingiatreilang bad ka Directorate of Sports and Youth Affairs, Meghalaya Athletics Association bad kaba la ithuh ruh da ka Athletics Federation of India (AFI).
Ha ka elite 21 km race, u Satish Kumar Verma ula jop na ki shynrang da kaba pyndep ia ka jingmareh hapoh ka 1:03:04 katba ka Tejaswini Narendra Lambkane kala jop na ki kynthei da kaba pyndep ia ka jingmareh hapoh ka 1:15:20.
Ha ka Meghalayan open 21 km, u samla Wolbetstar Ramsiej ula jop da kaba pyndep hapoh ka por 1:03:26 bad Marqueenless Ramsiej kala jop na ki kynthei da kaba pyndep ban mareh hapoh ka por 1:23:55.
Haba ai jingkren, u Myntri ka Tnad Sport Bah Wailadmiki Shylla ula ong ba ka marathon kala nang kiew naka 750 ngut ki nongmareh ha u snem ba sdang nyngkong sha ka 12,000 mynta.
Haba pdiang ia ki nongiamareh na ki 24 tylli ki Jylla, u bah Wailad ula ong ba ka marathon ka wanrah ia ka jingmyntoi ha ka ioh ka kot ka imlang sahlang, pynmyntoi ia ki nongpyniaid homestay, ki nongkamai kali bad ki nongrep, haba pynpaw shuh shuh ia ka nam jong ka Sohra kum ka jaka kaba ioh ia u slap ba jur bad ki kshaid.
U khlur mareh Ultramarathon ka India Sukant Suki Singh, uba dei u nong India ba nyngkong ban iakop mareh haduh 3 sien ia ka 200-mileultramarathon, uba la pynshongkun ia kane ka jingiakop, ula iaroh ia ki jingdon ki jaka ialehkai ka Jylla bad ka jingitynnad ka mariang.
Haba ithuh ia ka Meghalaya kum ka “Sporting Capital ka India ban wan” u Singh ula ai jingiaroh ia u Myntri Rangbah Conrad K Sangma namar ka jingpynkylla pura ia ka kam ialehkai ka thain bad ka jingpynroi ia ka sap alehkai naduh ka rta ba dang khynnah”.
Ha ka jingiakop mareh ba 10km, u Wankyrmen L Mawphlang ula jop napdeng ki shynrang ba 18-39 snem da kaba pyndep ia ka jingmareh hapoh ka por 28:28 bad ka Daplin Wahlang kala jop na I kynthei da ka jingpyndep ia ka jingmareh hapoh ka por 37:20.
U Bharat Bhushan ula jop na ki shynrang ha ka rta ba 40-45 da ka jingpyndep ia ka jingmareh ba 29:14 bad ka Mena Mary Wahlang kala jop na ki kynthei da kaba pyndep ha ka por ba 41:55, katba u Swonding Mawlong (38:07) bad Thlingda Wanniang (45:00), kila jop ha ka jingiakop ki shynrang ba kynthei bala kot ia ka rta ba 55 snem.
Ka Tnad ka pyntip ia ka khusnam pisa jong ka Elite category la pynkiew arshah ha kane ka kynta kaba long kat kum ka International Certification, kaba tyrwa T.3 lak ia ka 1st Prize, T.2 lak ia ka 2nd Prize bad T.1 lak ia ka 3rd Prize bad ka consolation prize ba T.10,000 naduh kiba ioh ia ka kyrdan ba 4 haduh ba phra.
Lah ai ruh ia ka khusnam pisa ba T.50,000, T.30,000 bad T.25,000 ha ki jingiakop ka Meghalaya open category.
