Agartala, Lber 02: U Myntri Kam Pohiing ka ri India u Amit Shah hynne ka sngi Saitjaiñ ula ong ba kaSorkar Pdeng kala lah ban pynbeit ia bun tylli ki jingeh ha ka Thaiñ Shatei Lammihngi bad kala pynlong ia ka thaiñ kaba lait na ki kam iaumsnam bad ki kam pyntriem jong ki kynhun kieng atiar ha kine ki snem kiba la dep hapoh ka jingsynshar jong ka National Democratic Alliance (NDA).
Ha ka jingiasoi ia ka Tripartite Agreement ha ka sngi Saitjaiñ ha Nongbah Delhi, ia katei ka jingiatehkular la iasoi hapdeng ka Sorkar Pdeng, ka Sorkar Tripura bad ka Tipra Motha Party (TMP) ban ai shuh shuh ia ka jingpynkup bor ia ki riewlum jong ka jylla, kiba don kawei na ka lai bynta na ki 40 Lak ngut ki nongshong shnong ha Tripura.
U Amit Shah ula ong ba palat 10,000 ngut ki dkhot jong ki kynhun kieng atiar kila iehnoh ia kam kieng atiar bad ia ka kam iaumsnam bad kila wan pyndem wait ialade hakhmat jong ka sorkar.
Haba ai jingkren haka jingialang jong ka jingsoi iaka Tripartite Agreement, u Amit Shah ula ong, ba la iasoi ia kiba bun tylli ki ‘Accord’ bad ki kynhun kieng atiar jong ka thaiñ shatei lammihngi ban pynneh pynsah ia ka shongsuk shongshngaiñ bad ban kyntiew ia ka roi ka par bad iaka bha ka miat jong ka thaiñ.
Ki ‘Accord’ kiba la iasoi bad ki kynhun kieng atiar ki bapher ki kynthup ia ka United Liberation Front of Asom (ULFA), Bodo, National Liberation Front of Tripura (NLFT), Dimasa, Karbi, Adibasi bad ki riewlum Reang.
Ka Tipra Motha Party ( TMP), kaba dawa ia ka ‘Greater Tipraland’ ne la ka jong ka jylla na ka bynta ki riewlum lyngba ka Article 2 bad 3 jong ka riti synshar ka ri, ka dang bteng ia ka jingiakhih ka jongka halor katei ka jingdawa naduh ka 28 tarik u Rymphang ha Hatoi Katar (Baramura).
 ban ai shuh shuh ia ka jingpynkup bor ia ki riewlum jong ka jylla, kiba don kawei na ka lai bynta na ki 40 Lak ngut ki nongshong shnong ha Tripura.){kind=link}