Shillong, Iaiong 26 : I Myntri ka Tnad ka Koit ka Khiah Kong Ampareen Lyngdoh hynne ka sngi Balang, ila ong ba ka jingdon jong ki nos ha Jylla ka long kaba pahuh bha haba pynpaw ba ki don bun shah ki nos ban ia ka kam ba lait ha Jylla.
“Namar kane, ka Tnad mynta ka sngew ba donkam ban wad ia ki lad ki lynti ia kine ki nos shano ban pynioh kam lane kumno ban leh na ka bynta ka jingim jong ki. Kumta, ka Sorkar kan sa iakren bad ki Institution kiba iatreilang bad ki Agency bapher bapher kiba lah ban iarap ia ngi ban aikam ia kine ki nos” ong I Kong Ampareen haba iakren bad ki nongthoh khubor.
I Myntri ila ban jur ruh halor ka jingdonkam ban pynthikna ba ki no kin hap ban ioh ia ka kabu lane ai jinghikai ia ki ban kren ia ki ktien thylliej bapher bapher.
“Kum ka nuksa, ngi tip ba ki don bun ki ri ka pyrthei kiba donkam ia ka jingshakri ki nos ki bym don satia ha kitei ki ri hynrei lada ki nos jong ngi ki long kiba don ka akor ka burom, lada ki lah ban ioh ia ka sap ban kren ia ki jait ktien bapher bapher ban kren ia ki Ktien jong ki Ri ka dewbah Europe, lehse ki lah ban kren French, Japanese, namar la iathuh ia nga dang shen ba ka don ka jingdawa ia ka jingshakri ki nos ha kine ki ri nongwei. Namar kata, ngi hap ban khmih ia kane ka jingbym iohkam iohjam wat ha kane ka kam ruh” ila ong.
I kong Ampareen ila ong ba ka Jylla kam don satia ia ki santion post kaba kot kumba 1500 tam bad bynrap ba “Ngi la phaikhmat ia ka sienjam kaba lah ban shim ha kaban pynthikna ba ka sanction post kaban long kat kum ki kyndon hapoh ka Ri ba kan don hangne”.
Ila ong “Man ka por haba phi hap ban plie ia ki PHC lane CHC kiba la dep ban tei hynrei haba phi iatakhuh bad kane ka jingeh ba kam don ka santion post. Namar kata, ngi hap ban buh ha ka jingmut jingpyrkhat jong ngi ia kane ka bynta namar katba ngi dang jam sha kine ki san snem ban wan, ngi hap ban phaikhmat sha ka song pisa ban kyntiew ia ki jaka ai jingsumar khamtam hadien ka jinglynshop ka khlam Covid. Ngo donkam mynta ban pynthikna ba shisien ba kine ki jingtei kiladon, ki dei ban don ia ki Nongtrei kat kum ka jingdonkam”.
Ha kajuh ka por, I Myntri ka Koit ka Khiah I pyntip ba ki dang don shibun bah ki kam Doktor Specialist kiba hap ban pyndap hapoh ka Jylla. “Nga tharai ngi kot ia ka 177 bad ka National Standard ka long 300 tam” ila ong.
I pyntip ruh ba ki don sa kumba 50-60 ngut ki doktor kiba la leit ban pule ia ka lain specialist.
