Shillong, Lber 09: U Myntri Rangbah ka Jylla Conrad K Sangma hynne ka sngi Saitjain, ula ot ribon ia ka ‘My City’ Campaign, ka jingialap ban pynkhuid ia ki shnong ki thaw bad plie ruh ia ka ‘Reimagining Streets’ nalor ka jing iashimbynta ha ka jingpynkhuid ia ka surok Dhankheti.
Haba kren ha ka jingialang kaba la pynlong ha Moreau Institte of Integral Training (MIIT) hadien ka jingpynkhuid ia ka Dhankheti Parking Lot, u Myntri Rangbah ula ong ba ki kynhun bapher bapher, ki riew shimet bad ki Tnad Sorkar kila leh ia ki kam hala ka jong ka bor ka sor bad ka long kaba donkam ban don ka jingiatreilang kawei jong baroh.
“Kane ka jingpynkhuid shnong ba ngi leh mynta ka dei kaei kaei kaba ngi kwah ban leh manla ka lai bnai namar ki jaidbynriew bad ka kolshor jong ngi ka dei ban pynlong ia ki kyntoit bad ki shnong ki thaw kiba khuid” ula ong haba bynrap ba bun bah ki shnong ki thaw kila leh hi ia kane ka kam khlem kano kano ka jingkyrshan.
U Myntri Rangbah ula ong “Ha ka sien ba nyngkong, ka Sorkar kala shim ia kane ka kolshor jong ngi ban pyntyllun shakhmat ha kaba kan sa ai song pisa man ka lai bnai ban iapynkhuid ia ki shnong ki thaw”.
Ula ong ruh ba kane ka ‘My City’ campaign kan sdang shuwa ha manla ki District Headquarter bad suki suki kan sa leit sha manla ki shnong ki thaw ka Jylla.
U Myntri Rangbah ula ong ruh ba ka jingthmu hi kan long ym ba tang shisngi ngin lah ban pynkhuid ia ka Nongbah lane ka sor baroh kawei hynrei ban wanrah ia ka jingkylla ha ka jingmut jingpyrkhat jong ki briew.
“Man ka por ba ngi pynkhuid ngi hap ban sdang sngewthuh ba ngi hap ban shim iala ka bynta bad ai ba baroh ki nongshongshnong ha ki sngi ba ka Sorkar kam bei pisa ia kine ki jingpynkhuid shnong, kin shim ia ka jingkitkhlieh ban pynthikna ba ngi pynneh ia ka jingkhuid jingsuba ka sawdong sawkun bad ba lait na ka jingbret niut” ula ong.
Haba pynpaw ba ki samla pule bad ki samla ki don ia ka bynta kaba khraw bha ha kane ka campaign, ula ong “Ki samla haba ki sdang ia ka movement, ka lah ban long kaba khlain bha” bad bynrap ba ka thong kaba bun hi ka long ban pynsngewthuh ia ki nongshongshnong ka Jylla ba kin pynneh ia ka jingkhuid jingsuba ki jaka sor bad ki sor rit.
Haba kren halor ka jingmut jong ka ‘Reimagining Street’, u Conrad ula ong ba kane ka dei ka sienjam bala shim ban pynlong ia ki surok kiba lah ban iaid kjat bad ong “Ngi don ia ka jingangnud ban shna ia ki lynti iaid kjat ba 10-15 kilometer, pynheh ia ki lynti iaid kjat bala don lypa kat haba lah toi, ban shna lynti iaid kjat biang ki ban iasoh kawei ia kawei pat khnang ba kan aimynsiem ia ki nongshongshnong ba kin iaid kjat”.
U Myntri Rangbah ulakren ruh ia ki sienjam bala shim kum ka jingpyniaid ia ki cable waiar napoh khyndew, ka jingai rong ia ki jingtei, ka jingshna ia ki lynti iiad kjat bad kiwei kiwei, ban pynitynnad bad pynkup dur bhabriew ia ka Nongbah. Ula pyntip ruh halor ki prokram bapher bapher jong ka Sorkar ban pynlong ia ka Jylla bad ki jaka sor, ki shnong ki thaw kiba khuid bad ba kynsai.
U Myntri Rangbah ula sam ruh ia ki song pisa da ka cheque sha ki nongmihkhmat jong ki Dorbar Shnong bapher bapher bad pyllait paidbah ruh ia ka Reimagining Streets Initiative Booklet ha kane ka sngi.
Ki samla pule college, ki dkhot ka NCC bad NSS, ki dkhot jong ki Dorbar Shnong bad ki SHG kila iashimbynta ha kane ka prokram.
