Shillong, Nohprah 05 : Ka Sorkar Meghalaya kala otribon ia ka jingshakri jong ki liengsuin Drone ha ka sien ba nyngkong eh ha Jylla ban pynpoi dawai dashin, pynkit ia ki snam ban leh test bad kiwei kiwei na kylleng ki jaka jong ka Jylla da kaba pyndonkam ia ka Drone Delivery Network.
Ka jingshakri jong kane ka project kala sdang da ka jingot ribbon ia ka Drone Delivery Hub ba nyngkong eh ha dewbah Asia kaba la tei ha Jengjal Sub-Divisional Hospital hynne ka sngi nyngkong da u Myntri ka Koit ka Khiah James K Sangma.
Ha kane ka sngi, ia u drone ba nyngkong eh la pynher na Jengjal Sub Divisional Hospital ban pynpoi dawai sha Padeldoba PHC kaba shimpor tang 30 minit ha ka jaka jong ka 2 kynta shiteng lada kit da ki kali.
Kane ka TechEagle Vertiplane X3 drone kala pynpoi ia ki dawai kynthup naduh ki dawai Snake venom-2 pax, Labetalol- 4 pax, Human Albumin-1 pax, Cefotaxime (typhoid dose)- 50 pax.
U James K Sangma haba otribon ia kane ka project ula ong “Ngi la iohi ia kaei kaei ka bym pat ju iohi ha kano kano ka jaka jong ka pyrthei. Ka dei ka jingsarong ia ka Jylla Meghalaya namar baka dei ka Jylla ba nyngkong ban pyndonkam ia ki drone kiba lah ban pyntreikam ruh sha kiwei kiwei ki jaka jong ka Jylla”
U Ramkumar S, Project Director, Meghalaya Health Systems Strengthening Project ula ong “ Nga kmen shibun ba ngi lah lah ban sdang ia kane ka jingtreikam ha ka Jylla, kaba thmu ban lah pynpoi ia ki dawai kiba iada ia ki jingim briew bad kiwei kiwei ki tiar sumar sah ki jaka nyngkong bad ba ieh ban leit ha ka Jylla”.
