Shillong, Nailur 12: U President ka Meghalaya Pradesh Congress Committee (MPCC) bad MP ka Lok Sabha Bah Vincent H Pala ula ong ba ka jingthmu jong ka BJP ban pynlong iaka ‘One Nation, One Election’ ka dei ka buit ban pynduh noh ia ki Party ki barit baria kiba don hapoh ka ri.
“Ka One Nation, One Election’ kam dei shuh kaba thymmai hynrei kadei ka jingthmu kaba la don naduh mynshwa, hynrei lada peit ia ka jinglong jingman haka ri baroh kawei nga tharai kan eh bha, hynrei lada ka sorkar ka leh ia kane kan long kumba iuhroit ia kito ki jylla kiban long ia ka elekshon ha kano kano ka por” ula ong.
U Bah Vincent ula ong “Kumba ka paw hi, ka BJP ka kwah ban pynduh noh ia ki party ki barit baria. Ha ka ri India baroh kawei, ki jylla kidon ia la ki jong ki party kiba ieng bad mihkhmat naka bynta ki riewlum, ki jaidbynriew lajong bad ter ter hynrei ka BJP ka kwah ban pynduh noh ia ki”.
“Ha ka jingsngewthuh ka jong nga, ka Congress kam hun ia kane ka jingthmu. Kala don ka por ba nga la dei uwei na ki dkhot jong kane ka Committee kaba iakren ia kane ka kam” ula ong.
U iathuh ba ki don bun kiba kwah ban pynlong ia ka ‘One Nation, One Election’ da kaba pynpaw ba kane kan pynduna ia ki jingpynlut ha ka por elekshon hynrei u ong “ na ka party Congress ngi la pynpaw ba kam long kaba iahap namar ba kan iuhroit ia ka hok jong ki briew”.
“Lada wan ka One India One Election, ka jingpynlong iaka elekshon kan long ia baroh, hynrei ki hap ban pynkylla iaka aiñ bad kumno kin pynkylla kila dep ban buh iaka Committee”.
