Shillong, Naiwieng 11 : Ka Manipur kala jop ia artylli ki takma ksiar ha ka sngi ba nyngkong jong ka Men’ Cycling ne iakop niah cycle ki shynrang, ha ka 2nd North East Olympic Games 2022 ba long hynne ka sngi thohdieng ha khlaw Malki.
Kine ki artylli ki takma ksiar ki dei jong ka elite bad junior cross country kiba dei jong ki shynrang.
Ha ka elite event, ki nongniah cycle kila ianiah ia ki cycle jong ki sha khlaw Malki bad kiew shaduh Lum Shyllong bad sa wan phai biang. Ha kane ka jingiakop, kila don ruh bun kiba mynsaw bad bun ruh ki cycle kila sniew shiteng hynrei ki rang ianiah cycle ki khlem pyndem satia.
Ia ka takma ksiar la ioh rah da u Khundrakpam Ronel Singh ka Manipur, ia ka takma rupa da u samla ka Jylla u Kevin John Khyllait bad ia ka takma rnong da u Mesak Vanlalvena na Mizoram ula lah pyndep ia ka jingiakop hapdeng ka jingjngem ka khmat namar ka jingur.
Shuwa kane, ha ka jingiakop ki Heprit, u AZ Thotmachan na Manipur ula ioh ia ka takma ksiar, u Pynshailang Khyllait ula ioh ia ka takma rupa bad u Vanlalruata ka Mizoram ula ioh ia ka takma rnong.
Ka jingpyndeng medal ia kine kan long lashai ka sngi saitjain hadien ka women cross country bad ka downhill event jong ki shynrang bad kynthei.
