Noh synniang ka Frank Yamaha da ki jain jri sha ki Pulit pyniaid kali ka Shillong

Shillong, Jylliew 20: Kum ka dak ban ai khublei iaka jingtrei shitom ki Pulit pyniaid kali haka nongbah, ka Frank Motors hynne ka sngi kala synniang haduh 300 tylli ki jain jri (Rain-Suits) sha ka tnat Shillong Traffic Police ban iada iaki na u slap haka por ba ki trei iala ka kam.

“Namar baka aiom lyiur kala wan, ki Pulit pyniaid kali ruh ki hap ban shah ia u slap, lyer bad kane ka pynthut iaka kamram jong ki Pulit pyniaid kali bad ban pyllait iaki naka jingjhieh bad shimtom por ki trei iala ka kam, ka Frank Yamaha kala synniang 300 tylli ki Rain Coat shaka tnat Shillong Traffic Police” ong u bah Indonlang Passah u badei ruh u CEO.

“Ngim lah ban siew kylliang daki kyntien hynrei ngin iai kyrshan iaki Pulit pyniaid kali daka jingai sngewbha daki Rain Coat khnang ba ki Pulit ruh kin lah ban trei iala kam khlem ka jingshah pynthut ha u slap” ula ong.

U bah Passah ula ong ba ka kam jong ki Pulit pyniaid kali ka long ka ba eh bha bad dei namar kane donkam ban ai khublei iaka jingtrei shitom jong ki.

“Ngi la jied kyrpang daki IGNYTE Rain Coat kiba 10,000 mm bad kine ki Rain Coat ym tang ki iada na u slap hynrei ki iada ruh naka lyer khnang ba ki Pulit kin lah ban trei iaka kam bad leit phai shala ki ing ki sem” ula ong.

U bah Passah ula iathuh ba kine ki IGNYTE Rain Coat ki don ruh ka jingshai ban iada iaki Pulit bad ban iarap iaki haka por mynmiet ban trei iala ka kam.

Ia kine ki IGNYTE Rain Coat, la aiti da u CEO ka Frank Yamaha sha u Superintendent of Police (Traffic) u Dr. Dara Aswaghosh haka jingdon lang u Deputy SP (Traffic) u bah Mac Joel Marngar.