Shillong, K’Lyngkot 12: Ki pulit ka East Khasi Hills ki la pynmih ia ka jingbthah ba kyntu bad kyrpad ia ki paidbah ba kynthup ia ki trai kali, ki nongpyniaid kali kamai bad ki nongleit nongwan ba kin iatreilang da kaba bud ryntih ia ki jingbthah ban pynthikna ia ka jingshngain bad ka jingiaid beit iaid ryntih ki kali.
Ia ka jingbthah la pynmih da u Superintendent of Police (SP) East Khasi Hills Bah Vivek Syiem. ka ba ong ba ym shah ban pynieng kali kulmar ha ki jaka ki bym dei hynrei ban pynieng haki jaka bala ai ka jingithuh lane ki jaka bala buh kyrpang.
Kino kino kiba pynkhien iaka jingbthah kin shah dain kuna naduh T.500 haduh T.1,500 na lane T.2,000 ha ryngkat ka shah tan kali katkum kyndon 177/179(1) MV Act).
Ki Local Taxi bad ki kali Tourist Taxi ki dei ban ieng tang ha ki jaka ieng kali ba la buh kyrpang lane ha ki jaka ba la ai bor ban pyn ieng kali.
Kiba pynkhien iaka hukum kin shah dain kuna naduh T.500 haduh T.1,500 katkum ki kyndon Section 177/179(1) MV Act).
Ka jingpynbna ka mana ruh ban niah iaid stet khamtam ha ki jaka ba bun briew, ki jaka ba kyllain, ne ki surok kiba rit.
La bthah ba ki nongñiah kali arshaka ba ki dei ban deng ïa ki helmet bad kiba pynkhien iaka ain kin shah dain kuna naduh T.2,000 haduh ₹10,000 katkum ka Sections 179(1)/184/194 MV Act.
La bthah ba ki kali kit mar ki dei ban da tap bha iaka kali bad kiba pynkheiñ kin shah dain kuna T.2,000 katkum ka kyndon 179(1) MV Act.
Ka jingniah kali haka por buaid ka dei ka kam beain bad iaki ba pynkhien iaka jingbthah kin shah pynngat haki kyndon ain.
Kino kino kiba lap ba ki niah kali hapoh ka jingdih kyiad kaba palat pud kin shah pynshitom katkum ka kyndon 185 MV Act ryngkat ka kuna T.10,000 lane shah set phatok haduh 6 bnai lane baroh ar.
