Nongstoiñ, Lber 13: Ka Khasi Students Union-West Khasi Hills hynne ka sngi,kala thang paidbah ia ka CAA Rule ha Nongstoin, ban pyrshah ia ka jingpyntreikam ia ka Citizenship (Amendment) Act, 2019 hapoh ka Ri.
Kane ka seng ki samla pule, kala pynlong ruh ia ka jingialang paidbah ban pynshai bad pynsngewthuh ia ki paid bah halor ki nongrim ka jingpyrshah ia kane ka Ain, kaba la mynjur da ka Iingdorbar Parliament ha u Nohprah 2019.
Ki Nongialam ka KSU-WKH kila kynthoh jur ia ka Sorkar Pdeng halor ka jingbym sngap ia ka sur u paidbah haba wanrah ia kane ka Ain bad ong ruh ba ka dei ka jingbym pyrkhat lang ia ki jaidbynriew rit paid kiba lah ban shah tyllep ha ki hehpaid lyngba ka jingailad ia ki briew ba wan phet na Bangladesh, Pakistan bad Afghanistan.
Kila pyntip ba ka KSU lem bad kiwei ki Sengbhalang ka Jylla, kila pynlong ia ka jingiakhih kaba jur ban pyrshah ia kane ka Ain naduh ka sngi ba wanrah ia ka. Kane ka jingiakhih paidbah kala jia ruh ha kylleng ki Jylla jong ka Ri namar ka jingiohi ia ka jingma kaba ap na ka jingioh long nongshongshnong kine ki briew ba wan phet wir.
Kila ong ba ka jingpyntreikam їa katei ka aiñ ka dei ka jingїuhroit їa ka hok jong ki jaitbynriew rit paid kiba shong ha ki jylla ka thaiñ shatei lam mihngi. Ki la pynshai ba ki jylla ka thaiñ shatei lam mihngi kum ka Meghalaya, Tripura, Mizoram ki dei ki jylla kiba mar khap bad ka ri Bangladesh kumta ka jingpyntreikam їa katei ka aiñ ka long kaba ma shibun.
Ki la pynshai ruh ba ha ki snem ba mynshuwa eh ki bar jylla kiba wan rung hapoh Meghalaya, ki wan tang kum ki nongbylla bad kiba wan trei ha ki ophis sorkar. Hynrei ha kine ki sngi ka sor Shillong ka la kylla long ka nongbah jong ki bar jylla suda, ha kaba ki bar jylla ki la knieh lut їa ka kami kajih, ka bylla ka sngi, ka trei ka ktah bad ha baroh ki liang.
Ki nongїalam ka KSU ki la pynpaw baka Seng kan iai їeng pyrshah bad kan ym ailad ia ka sorkar ba kan pyntrei kam jubor їa katei ka aiñ hapoh ka Jylla.
