Shillong, Lber 08 : U Nongialam ka NPP bad Myntri barim ka Sorkar Bah Hamletson Dohling, ula kynthoh “Ngim dei ban ailad ia ki khwan myntoi” haba kdew ia ka North East Sunshine Trust (NEST) kaba kwah ban tih ia u marpoh khyndew Uranium hapoh ka Jylla Meghalaya.
Kat kum ka jingong jong u, kane ka seng ka bym ju bna mynno mynno ruh (NEST) kam dei ban mushlia ia kane ka kam kaba ka Sorkar Jylla kala dep rai kut ban khylliap noh ia ka lynnong jong ka kam tih Uranium hapoh ka Jylla.
Kane ka jingkynthoh kala mih halor ka dorkhas jong ka NEST bala phah sha u Dr Jitendra Singh, Myntri Khynnah ka Department of Atomic Energy, ka Sorkar India ba kyrpad ban pynim biang ia ka kam tih Uranium ha Meghalaya. Ia kane ka dorkhas la phah da ka Founder Trustee bad Chairperson Kong Elizabeth Matthews Nongbri myn ha ka 26 tarik Rymphang 2024.
U Bah Hamlet ula ong ba ka Sorkar Jylla kala dep rai ban pynduh pyndam ia ka jingthmu tih uranium ka UCIL ha Jylla naduh u snem 2016 bad kala pynkut syndonruh ia ka jingiateh kular bad ka Sorkar Pdeng ban aiwai ia ki jaka ba don ka par uranium ha South West Khasi Hills.
“Kane ka NEST ka mut aiu…ka leit tynruh ia ka Sorkar Pdeng halor kaei ka nongrim…Ka dorkhas kaba ka phah kala paw shai ba ka kwah long agent jong ka UCIL bad ban kamai spah” ula ong.
U Bah Hamlet uba bat kum u General Secretary barim ka KSU bad uba ju ieng pyrshah bha ia ka kam tih uranium ha Jylla, ula ong “Ngi na ka NPP kaba lamkhmat ia ka Sorkar, ngin ym ailad da lei lei ruh ban tih ia u uranium napoh ka Jylla-kaba la pyrshah jur bha ruh da ki kynhun Sengbhalang bad ki paidbah”.
 kaba kwah ban tih ia u marpoh khyndew Uranium hapoh ka Jylla Meghalaya.){kind=link}