Shillong, Nailar 02 : Hapdeng ka jingsngew bapher bapher halor ka jingpyntreikam ia ka National Education Policy (NEP)-2020, u Myntri Rangbah ka Jylla Conrad K Sangma ula ong ba ka Jylla kan hap ban jam lang shakhmat hynrei kan sngap ia ka jingpynsngew u paidbah, ki Nonghikai bad ki College bad kin hap ban khmih kumno ban jam shakhmat bad iatreilang ha kaban weng ia baroh ki jingeh.
“Ngin hap ban jam shakhmat. Hynrei kam mut pat ba ngin shu thom da ka bor ha ka lynti iaid. Kam mut ruh ba ngin ym shim lang ia ka jingsngew jongki College bad ki Nonghikai” ong u Myntri Rangbah haba iaren bad ki nongthoh khubor ha ka sngi Balang.
U Conrad ula bynrap ba ka jingpyntreikam ia ka haba phai sha ka jingdon ki briew ban shakri bad ki jingtei kiba donkam, kin dei kawei na ki jingeh. Ula ong, namar kata, ha kano kano ka jingkylla ha kano kano ka rukom treikam, kan don beit ki jingeh hakhmat.
U Myntri Rangbah ula pyntip ba ia baroh ki college Sorkar, ka Sorkar kam sa leh ia baroh ki sienjam ba donkam ban leh kum ka jingai jingkyrshan.
“Ki college deficit kiba la kyrshan da ka Sorkar hynrei kiba la pyniaid laitluid da ki Managing Committee, kiba la ioh ia ka jingkyrshan na ka Sorkar, kane ka jingkyrshan kan nang iai bteng. Ngin hap peit ba haduh katno ngi lah ban kyrshan namar ki don bun ki college bad ngim lah ban shu pynthiknaba ngin leh lut ia baroh. Ki Management Committee, ki nongbei tyngka ia ki college ruh kin hap ban iatreilang hakti hakjat bad ka Sorkar ban lah pynurlong” bynrap u Conrad.
Pule lang ia kane: Kyrpad ki MP ka INDIA ia ka President ban phah kren ia u PM ha Parliament halor ka jingjia Manipur
Peit lang ia kane
