Shillong, Nailar 19 : U Nongialam barim ka Congress bad MLA ka Umsning Dr Celestine Lyngdoh ha ka sngi Nyngkong, ula ong ba ma u ha ryngkat ki arngut ki MLA-Bah Gabriel Wahlang bad Charles Marngar-kila wan iasoh sha ka NPP da ka jingkyrmen ban lah wanrah ia ki kam pynroi hala ki jong ki jong ki constituency.
Haba kren ha ka jingialang pdiang sngewbha ia ki da ka NPP, u Dr Celestine (Dr Bom) ula ong ba ki jinglong jingman kila dawa ia ki lai ngut ki MLA ka congress ban ianoh bad ka seng sain pyrthei kaba don ha ka liang Synshar.
“Ka dei ka lynti kaba ngi baroh ki shim bad ngi rai sha ka mon ne ka diang haba ngi iohi ba ka lynti iaid sha ka mon ka kham duna ia ka jingmyntoi ia ki paidbah ba ngi mihkhmat, ngi hap ban iaid noh sha ka diang. Ka jinglong jingman ka dawa ba ngi dei ban iaid sha ka lynti ka diang. Kane ka dei ka jinglong jingman kaba ngi baroh laingut ngi la rai ban shim. Kam dei ba ka lynti iaid sha ka mon ka dei kaba sniew lane kaba bakla, ka lynti ka dang don beit hangtei hynrei ngi hap peit iaka jingmyntoi jong u paidbah uba jied ia ngi ban wanrah ia ka jingkylla bad ki kam pynroi”.
Haba iaroh ia ka Sorkar MDA hapoh ka jingialam u Myntri Rangbah Conrad K Sangma, une u MLA ka Umsning ula ong “Kam long kaba suk ia ngi ban ong ba nga la ieh iala ka jong ka party kaba nga la shah jied bad leit iasoh sha kawei ka party hynrei ka jingshaniah bad jingngeit ba ngi don hapdeng u CM bad ma ngi da ka jingkyrmen ba ki jingiateh kular bad ki jingkut jingmut ba ngin wanrah ia ki jingkylla ha ki constituency jong ngi, ka dei kaba mait ia ka lynti ia kiei kiei baroh kiba jia mynta”.
“Nga ju don beit ia ka jingphohsniew kaba bha na ka bynta ka constituency bad nga ju don ruh ia ka jingphohsniew kaba bha na ka bynta ka Jylla bad lehse mynta ka sngi lyngba kane ka Sorkar bad ka NPP, ngi lah ban pynurlong ia kane ka jingphohsniew. Ngim lah ban ong ba man ki kyndong kynshrot ka Meghalaya, kan kylla kum ka New York ha ki san snem ban wan hynrei ka roi ka par ka dei ka lynti iaid kaba ngi hap shim kawei ka sienjam hadien kawei pat” ula ong.
U Dr Celestine ula ong ba ka NPP kala ioh mynta ia ka absolute majority da ka jingdon ki MLA haduh 31 ngut ha Iingorbar Thaw Ain bad kane kan ailad ia ka Sorkar ba kan shimrai ia kaei kaba bha tam na ka bynta ki paidbah ka Jylla.
