Dawa panmap hapoh 7 sngi ba kynnoh ‘Kingpin’ khaii droks
Shillong, Nailur 22: U Henry Lalremsanga ula phah da ka ‘Legal Notice’ sha u Myntri Rangbah barim bad Nongialam ka All India Trinamool Congress (AITC) Dr Mukul Sangma ba dawa ban siew ia ka bai mynrain khmat ba T.20 klur nalor ban panmap halor ka jingkynnoh ba u dei u ‘Kingpin’ ki kam khaii droks hapoh ka Iingdorbar Thaw Ain ka Jylla Meghalaya.
Une u Nong Mizoram uba dei u Chairman ka 2B’s Group of Companies, ula dawa ia u Dr Mukul ban siew ia kane ka bai pyn mynrain bad ban panmap hapoh ka 7 sngi lem kumta un mudui da ka mukotduma kam bymman (Criminal) bad Civil suit pyrshah ia u ha Iingkashari.
Ia kane ka ‘Legal notice’ la phah da u Bah K Kharmawphlang & Associates, Advocate and Legal Consultant jong u Henry Lalremsanga.
Kane ka ‘Legal Notice’ ka kren halor ka jingkynnoh bym shong hok bad jingkawang ktieh ia ka longryngieng jong u Lalremsanga hapoh ka Dorbar Synrai jong ka Iingdorbar Thaw Ain bad ka jingkren sha ki lad pathai khubor kiba mih paidbah ha ka 19 tarik bad 20 tarik Nailur, 2023. Kala pynpaw ba kine ki jingkynnoh kila saphriang kylleng sawdong bad buh ha ka jingma kaba bun ia u Lalremsanga shimet bad ha ki kam ba u trei.
La pynpaw ba u Lalremsanga ula shah kem khlem shonghok ha u snem 2013 haba iadie bad ka jingkurup ia ki dawai ba shalan watla u don ia ka Licence ban shalan ia ki dawai. Ka Iingkasahri Special Court NDPS Act, Patiala House Court, New Delhi, ha ka 218 kala pynkut ia kane kacase da kaba ong ba duna palat ki sakhi ban pynshisha ia ka jingpynkhein ain.
Ka Notice ka ong ba ka jingkynthoh pynjahburom, ka bym don ka jingshisha, kala wanrah ia ka jingsngewdiaw kaba jur ia u Lalremsanga, ia ka Iing ka sem jong u bad ia ki kam ba u leh shabar ka Ri. Kane ka jingkynthoh kala ktah ia ka Jaidbynriew Mizo hakhmat ka pyrthei.
U Legal Council u Lalremsanga ula pynpaw ruh ba kine ki jingkynnoh ba pohdor, ki dei kiba la pynmih khnang tang ban myntoi ha ki kam sain pyrthei.
Nalor ki jingdawa bai mynrain khmat bad ban panmap, la dawa ruh ba dei ban sangeh shisyndon ha kaban pynmih ia kino kino ki jingkren lamler bad jingkynthoh pynjah burom ia u Lalremsanga.
La ong ba kane ka ‘Legal Notice’ kan dei ka ruh kum ka kabu ba khatduh ban pynbeit ia ki jingleh bakla kaba la pynjah burom ia ka burom ka ijot jong u Lalremsanga.
 Dr Mukul Sangma ba dawa ban siew ia ka bai mynrain khmat ba T.20 klur nalor ban panmap halor ka jingkynnoh ba u dei u ‘Kingpin’ ki kam khaii droks hapoh ka Iingdorbar Thaw Ain ka Jylla Meghalaya.){kind=link}