Nongstoin, Risaw 11 : Ka Iingkashari Special Judge (POCSO) ka West Khasi Hills, kala hukum ban set phatok haduh 20 snem ia arngut ki briew kiba leh beijot ia ki Khynnah kynthei ha ki artylli ki jingjia ba jia hapoh ka District.
Uwei na kine u dei u Himborlin Puwein uba la leh ia kane ka kam bymman ha ka 7 tarik Risaw 2017, ia kaba la register case ha Nongstoin Police Station kat kum ka case no 102(10)2017 hapoh ka kyndon 342/506 pule lang bad ka kyndon 5 (1)(n)/6 jong ka POCSO Act.
Uwei pat u dei u Rishan Marwein uba la leh beijot ia kawei ka Khynnah ha ka 20 tarik Risaw 2020. Ia une ruh la register case ha Nongstoin Police Station kat kum ka case no 72(10)2020 hapoh ka kyndon 5(1)(n)/6 POCSO Act.
Ka Iingkashari Special Judge (POCSO) kala pynmih ia ka hukum ha ka 29 tarik Nailur 2023, ba hukum ban set phatok haduh 20 snem ia u Himborlin Puwein ryngkat ka kuna ba T. 50,000 kat kum ka kyndon 6 jong ka POCSO Act bad shisnem hapoh ka kyndon 506 part-II IPCnalor ka kuna ba T.1000.
Kane kajuh ka Iingkashari kala pynmih ruh ia ka hukum ban set along 20 snem ia u Rishan Marwein lem bad ka kuna ba T. 30,000 halor ki kam bymman ba hap kat kum ka kyndon 6 jong ka POCSO Act.
