Shillong, Nohprah 16 : Ka Iingkashari Judicial Magistrate First Class ka East Khasi Hills, kala hukum ban set along haduh 11 bnai ia uwei u nongtuh thuk thuk uba la shah kem ha ki Pulit ha u snem bala lah.
U Superintendent of Police ka East Khasi Hills u pyntip ba une u nongtuh thuk thuk u dei uba la tip kyrteng u Rocky Pala uba donkti ban rong tuh ia kawei ka thuk thuk FZ ba don u nombor ML05-J-2756 na ka thain Rynjah.
Kat kum ka jingong jong u, ki Pulit ka Rynjah kila ioh pdiang ia ka ejahar halor ka jingshah tuh kane ka thuk thuk bad ha ka jingtohkit la lap ba donkti u Rocky Pala, ia uba la ioh ban kem na Mookyrdup, Jaintia Hills.
Ki Pulit kila register case ia u hapoh ka kyndon U/S 379 IPC bad la chargesheet ia u ha ka 27/01/2022.
Ka Iingkashari ha ka 1 tarik kala shem ba u Rocky Pala ula donkti ia kane ka kam bymman bad la pynngat ia u ban shong along haduh 11 bnai.
