Shillong, Nailur 27 : Lai ngut ki Nonglute kali ha ki surok National Highway kila ngat ha ka shrip jong ki Pulit hadien ka jinglute ia kawei ka trok ha East Jaintia Hills District.
Kane ka jingjia kala jia hynnin ka miet sngi nyngkong ha ka por ba kine ki nonglute ki dang pynieng ia kawei ka trok bad dang lute na u nongniah ba kynthup ia ka pisa bad ka phone jong u.
Halor ka jingioh khubor, ki Pulit ka District kila hiar wut wut ban kthong ia kine ki runar bad kila ioh ban kem tang hadien katto katne kynta. Na kine ki runar la ioh ban kurup kawei ka mobile phone, ka pisa ba T. 4500 bad kawei ka kali Alto 800 ba pyndonkam ha kane ka kam pyntriem.
Ki Pulit kila register case ia kine ki runar bad ka jingtohkit mynta kala iaid sahkhmat.
