Shillong, Naiwieng 16 : U Symbud Myntri Rangbah ka Jylla Bah Prestone Tynsong ula pynpaw ba um don jingpyrshah satia ia ka jingdawa ban phiah noh ia ka Khasi Jaintia State bad ka Garoland.
“Em, ngam don jingpyrshah satia ia ka jingdawa phiah ia ka Jylla” ong u Bah Prestone haba iakren bad ki nongthoh khubor.
Haba pynpaw ba kam dei ka kam kaba suk ban ioh ia ka Jylla thymmai, u Symbud Myntri Rangbah ula ong “ Kam dei kaba suk hynrei lada ngi ioh kan bha eh”.
“I ba rit I dei iba itynnad” ula ong haba sot ia ka jingkren u Myntri Rangbah barim ka Jylla (L ) BB Lyngdoh.
U Bah Prestone ula ong ba kane ka jingdawa ka dei kaba la sdang nyngkong da u (L) Hopingstong Lyngdoh bad u (L) Clifford Marak.
U la bynrap ba u Bah Hoping u la ialam ia ka jingiakhih ban dawa Khasi Jaintia State tad haduh ba un da khlad na kane ka pyrthei bad u Clifford Marak ruh ula thaw ia ka Garo National Council ban nang kyntur ia ka jingdawa ban thaw ia ka Garoland.
