Nongstoin, Nohprah 15 : Iwei I heprit I la duh ei ia la ka jingim katba I dang ialehkai para khynnah ha la ka jong ka phyllaw iing namar ka jinghap hapoh ka thliew painkhana.
Kane ka jingjia kala jia hynne ka step sngi palei ha ka por 9 baje eiei, ong ka khubor na ki Pulit kiba iathuh ba ine I heprit I dei iba la tip kyrteng kum ka Lenisha Nongkhar 2 snem ka rta, iba dei I khun Tasiana Nongkhar bad u bah Kardius Syiemlieh kiba shong ba sah ha ka shnong Siejlieh, Nongstoin, West Khasi Hills District.
Ki Pulit ki pyntip ba itei I heprit I la kum hap ha katei ka thliew painkhana kaba dang tih thymmai, kaba la dap da ka um.
Ki iathuh ba ki nongtih ia katei ka thliew ki la ia tap bha da ki tin ia kane ka thliew ha baroh ki sngi bala leit noh, ban lait na kino kino ki jingmynsaw pynban mynne mynstep ki la leit khyllie ban bteng ia ka jingtih pyndep ia katei ka thliew .
Hynrei la ong ba dei ha ka por ba ki dang ialeit dihsha shuwa ban bteng iala ka kam, kila ioh jingtip ia kane ka jingjia kaba sngewsih katba ki dang don ha dukan sha.
