Shillong, Naiwieng 17 : U Myntri Sorkar bad MLA ka HSPDP na Mawkyrwat Bah Renikton L Tongkhar hynne ka sngi palei ula ong ba ka jingthmu jong u ban pyniasoh sha ka United Democratic Party (UDP) ka dei namar ka jingkwah pynthikna ba kan don tang kawei ka seng riewlum kaba khlain ha Jylla.
“Ka jingthmu jong nga ( ban iasoh sha kawei pat ka party) ka long shai bha bad kata ka long ban pynkhlain ia ka seng riewlum ha Jylla. Nga kwah ban iohi ba ka Meghalaya ka don tang kawei ka seng riewlum kaba khlain” ong u Bah Renikton haba iakren bad ki nongthoh khubor.
Une u MLA ba dang jop ha ka sien ba nyngkong eh, ula kyntait ba ula shah khroh ha ka UDP bad ong “Ban long u MLA, ngi dei ban long rangbah ha kaban shim ia ka rai na ka bynta ka jingbha jong ki paidbah ha ka Constituency bad ruh ha ka Jylla khnang ba ngin lah ban shakri bha. Kam donkam ia ngi ban shah khroh hangno hangno ruh ne ngop ha ki shrip jong kiwei”.
Halor ka jingphriang khubor ba un tam kput ha u 2023 lada u dang iai neh bad ka HSPDP, u Bah Reniton ula kubur baka rai jong u ban iasoh sha kiwei pat ki party kila pynmih ia ki jingbyn sngewtynnad bad kiba sngewtynnad hapdeng ki paidbah bad ong “Katto katne ki briew kila ong ba lada phi dang iia neh bad ka HSPDP phin ioh ia ki nongkyrshan ba thymmai hynrei nga ong ha phi ba ka biang beit namar kano kano kaba nga leh ka dei kaba la leh da ka jingiasyllok bad jingai jingmut jong ki briew jong nga”.
Ka HSPDP kala dep pynbna ia ka rai ban pynieng ia u Bah Medalson Lyngdoh Tongkhar kum u kyrtong na Mawkyrwat ha ka elekshon MLA 2023.
Haba pdeng ia kane ka rai, u Bah Renikton ula ong ba u sngewthuh ba lada ka party kaba don ia u MLA hynrei kam pynieng kyrtong, kane kan pyni ia ka jingbym biang sha ki paidbah.
“Namar kata, nga ong ka biang, ngam sngew eiei. Ngam don eiei pyrshah ia ka HSPDP ba kan pyrieng kyrtong pyrshah ia nga. To ngin sa ia peit, ngam don jingsngew eiei, Ngan iakhun ia ka elekshon bad ngan ieh ha ka jingstad jong ki paidbah ka Mawkyrwat ba kin rai shano ba kin thep vote” ula ong.
Haba kylli lano ba un mih noh na ka HSPDP bad iasoh sha ka UDP, une u Myntri Sorkar ula ong ba u dang ap ia ka por kaba dei ban mih bad ula pynkhreh ban mih iakhun ia ka elekshon kam pher wat lada ka elekshon ka long kham kloi.
Ha kawei ka liang, u Bah Renikton ula ong ba kam da don satia ka jingiapher hapdeng ka UDP bad ka HSPDP naba baroh artylli ki dei ki seng riewlum.
“Ia nga hi, kine baroh artylli ki party kila kyrshan ia nga ha ka elekshon 2018 bad ngam sngew ba kan don ka jingiapher namar baroh ar ki party kila vote ia nga ha u 2018 bad nga ju kam ruh ialade ba nga dei u MLA na baroh artylli ki Party” ula ong.
