Nongpoh, Nohprah 14: ‘Ka jingshakri para briew ka dei ka jingshakri ïa u Blei’, ïa kine ki kyntien la pyni nuksa da ka Dorbar Shnong jong ka Umkadhor, kaba la mih shakhmat ban pynshna da ka ïingshong iing sah kaba paka ia iwei i mei-ïeid i ba la im sangsot namar ka jingduk la bun snem ha katei ka shnong.
Ine I mei-ïeid I dei i ba la tip kyrteng kum i Kong Noris Rani i ba la shong sohsat tang ha ka iingtrep ba la jot rathai ha ka shnong Umkadhor. Ka Dorbar Shnong kala pynshna kyrpang ia ka Iing ba paka ia ine I mei-ieid bad la aiti bad plie ïa kane ka ïing hynne ka sngi Balang ha ryngkat ka jingkyrkhu pynkyntang da u Fr. Michael Sun Parish Priest ka Umkadhor Parish, haka jingdonlang u Bah Andreas Tron Sordar ka Umkadhor.
Haba kren ha kane ka sngi kum ka jingkyrkhu pynkyntang ïa kane ka Iing, u Fr. Micheal Sun, u la ai ka jingïaroh kaba khraw ia ka Dorbar Shnong Umkadhor kaba la pyni ïa ka nuksa babha ban kyrshan lem ïa kito ki longïing kiba donkam ïa ki jingïarap ha kiba bun ki bynta khamtam kum kane ka jingpynshna da ka ïing na ka bynta i mei-ïeid Noris Rani i ba la im sohsat da kiba bun snem.
“Ki don bun kum i mei-ïeid kiba im sohsat bad jynjar namar ka jingban ka jingduk jingrangli, kumta kum ki briew kiba don lad, ngi dei ban shim ïa kane ka nuksa ba bha ba la pyni da ka Dorbar Shnong Umkadhor khnang ba kito ki longïing kiba donkam ïa ki jingkyrshan kin ïoh ïa ka jingmyntoi bad ka jingkyrkhu na ka bynta jong ki”, ong u Fr. Sun.
I mei-ïeid Noris Rani, i la pynpaw ia ka jingkmen kaba khraw ban ïoh pdiang ïa kane ka ïing kaba paka na ka Dorbar Shnong, ha kaba i la ai khublei kyrpang bad ka jingkitbok ïa ka Dorbar Shnong ba kan nang ïai lah ban leh ïa kum kine ki kam synei bad ban nang roi parum pareh ha ki kam shnong kam thaw, da kaba bynrap ruh, ba mynta i la hun ban bam tang ka ja suda namar ba i la ïoh ka jaka riehtngen kaba paka haba nujor ïa ki jingeh ba i la mad ha ka jinglong jingim ba marwei ka jong i.
