Shillong, Naiwieng 14: Saw tylli ki Jylla kila phaikhmat mynta ban ioh ia ka takma ksiar ha ka jingialehkai basketball phainal jong ki kynthei bad shynrang ha ka North East Olympic Games, kaban sa long lashai ka sngiba-ar ha NEIGRIHMS Indoor Basketball Court.
Ka Meghalaya kala ioh rung sha ka phainal ha ka jingialehkai ki kynthei da kaba pynliem ia ka Nagaland da 67-18 basket ha ka jingialehkai semi phainal ba long hynne ka sngi nyngkong. Hadien kane, la pynthikna ba kan iakynduh ia ka Sikkim ha ka phainal hadien ka jingjop ia ka Mizoram da 81-32 basket.
Ka phainal jong ki shynrang kan long hapdeng ka Mizoram bad ka Assam hadien ba kila jop ia ki jingiakhun semi phainal. Ka Mizoram kala pynliem ia ka Manipur da 96-62 basket bad ka Assam kala pynliem da ka said ia ka Nagaland da 73-71 baslket
Ka jingialehkai ia ka takma rnong kan long lashai ka sngi ba-ar hapdeng ka Nagaland bad ka Mizoram ha ka jingialehkai ki kynthei ha ka por 9 baje mynstep bad hadien kan long sa ka jingialehkai ka Manipur bad ka Nagaland jong ki Shynrang ha ka por 10:30 baje mynstep.
Ka jingiakhun phainal hapdeng ka Meghalaya bad ka Sikkim kan long ha ka por 1 baje nohphainal bad jong ki shynrang hapdeng ka Mizoram bad ka Assam kan long ha ka por 2:30 baje .
