Shillong, Naiwieng 16 : Ka Mizoram kala pynpait dohnud ia ki hajar ngut ki nongkyrshan bad pynkmen iala ki jong da ka jingjop ba 2-1 kol ia ka phainal phutbol U-21 pyrshah ia ka Meghalaya hynne ka sngi palei ha ka 2nd North East Olympic Games ba long ha madan Polo.
Ka jingiakhun kala kut ha ka jingiakhaid ha ka kylla step hynrei dei ka minit ba 54 jong ka kylla miet, u Rohlupuia ula ioh ban thep ia ka kol ba nyngkong bad la pynbud sa ka kol jong u Malsawmtluanga ha ka minit ba 80.
Ka Meghalaya kala iakhun dohiap ban ioh pynphai ia ka kol bad dei ha ka 87 minit ba kala ioh ban thep ia ka shikol lyngba u Oresterwell Langshiang.
Ka madan kala khapngiah smam da ki nongpeitkam haduh ba ka Meghalaya Football Association (MFA) kala hap ban pyndait ia ki giant screen hajan ka madan First Ground khnang ba ki riew ieid phutbol ki bym ioh jaka ban rung sha ka madan ialehkai, kin iohban peit live ia ka jingiakhun.
Shuwa kane, ka Manipur kala ioh khur ia ka takma ksiar ha ka jingialehkai phutbol U-17 ki kynthei da kaba pynliem ia ka Arunachal Pradesh da 4-0 kol. Ka takma rnong kala leit sha ka Manipur (U-21 men) bad Mizoram (U-17 women) kiba jop ia ki jingialehkai third place hynnin ka sngi.
U Myntri Rangbah ka Jylla Conrad K Sangma bad u Myntri ka Tnad Ialehkai Bah Banteidor Lyngdoh nalor u Chief Secretary Bah D.P Wahlang bad kiwei kiwei, kila wan ban sakhi ia kine ki jingialehkai phainal.
Ha kane ka sngi la sam ruh ia ki khusnam shimet. Ha ka U-17 women, ka Keisham Melody Chanu na Manipur kala ioh ia ka Golden Glove, ka Loktongbam Shelia Devi na Manipur (Golden Boot), Angel Tamang na Arunachal Pradesh (Player of the Tournament).
Ha ka U-21 men, u H Lalrinzuala ka Mizoram ula ioh ia ka Golden Glove, Joseph Lalvenhima ka Mizoram (Golden Boot), Figo Syndai jong ka Meghalaya ula ioh ia ka khusnam Player of the Tournament.
