Shillong, Naiwieng 30: Hadien hynriew sngi ba la lah ban pyniaid shaphrang ia ka 7th Elite Men’s National Boxing Championship, 26 ngut ki rangiakura kila jam sha ka Final bad ban iaknieh ia ka nam lahduh ha ka sngi Thohdieng.
Ha kane ka lympung iakura kaba la long ha SAI Indoor Hall, kila don haduh 400 tylli ki jingiakhun ha ki hynriew sngi ba la lah ban pyndep ia ki jingiakhun kiba don haduh 13 tylli ki kyrdan ialehkai bad hynne ka sngi Palei, la lah ban pyndep ia baroh ki jingiakhun semi final. Mynta ki nongiakura kila khmih lynti ban khur ia ki takma ksiar bad ruh ban pynkhreh na ka bynta ki lympung iaknieh rung sha ka Olympic.
U rangiakura ka Services u Amit Panghal, uba la khur ia ka takma rupa ha ka World Championships 2019, ula pynliem noh ia u rangiakura ka Railways u Ankit ha ka Flyweight 48-51kg. Ha kum kane ka jingiakhun na ka liang ki nongbishar ki la rai jop ia u da 5-2.
Kumjuh kam shym la don jingeh ia u khlur iakura ka Assam u Shiva Thapa, uba la khur takma teng haduh hynriew sien ha ka Asian Championships, ha kaba u la khur jingjop ha ka light Welterweight 60-63.5kg da 5-0 pyrshah ia u Harivansh Tawari jong ka Maharashtra.
U Harsh Choudhary na Rajasthan u la lah ban rung sha ka final ha ka kyrdan iakura jong ka Light Heavyweight 75-80kg, hadien ba ula pynliem ia u rangiakura na Delhi u Harsh Lakra.
Ha ka kyrdan iakura jong ki Heavyweight 86-92kg bad Super Heavyweight 92kg-plus, u Sanjeet, uba long u lahduh ha ka Asian Championship 2021, jong ka Services ula khur jingjop lyngba ka jingiarai lang da baroh ki nongbishar pyrshah ia u Vicky jong ka All India Police.
U rangiakura ka Railways u Sagar, uba la khur ia ka takma rupa ha ka Commonwealth Games 2022 u la jop da 5-0 ia u Vishal Kumar uba na Delhi.
Ïa kane ka lympung iakura la pynlong da ka Meghalaya Boxing Association ha ryngkat ka jingïatrei lang bad ka Boxing Federation of India bad kaba la kyrshan lang da ka tnat Sports and Youth Affairs jong ka Sorkar Jylla. Ia ka jingiakhun final yn pyni paidbah lyngba ka channel Doordarshan bad kumjuh ha ka YouTube channel jong ka BFI.
