Nang sei ka HYC ia ki sakhi halor ka jingkynnoh jyrsieh thied tin sop iing ba T.69 klur

Shillong, Risaw 01 : Ka Hynniewtrep Youth Council (HYC) ha ka sngi Ba-ar, kala kynnoh ba ka Notice Inviting Quotation (NIQ) bala pynmih da ka Directorate of Housing ha ka 10 tarik Nailur, ka pyni ia ka jingleh bymhok bad jingpyrshang ban ai jingmyntoi tang ia ki katto katne ki kompani ne nongshna tin ha Meghalaya ba kin pynpoi ia ki Aluminium Roofing Sheet sha ka Tnad kaba shongdor haduh T.69,65,00,000.

U President ka HYC Roykupar Synrem ula ong ba ki kyndon bala buh da ka NIQ ki dei kiba la shna ha kata ka rukom kaba pynsngew ba ka tnad kala ai kabu ia ki briew kiba don jingiadei ba iajan bad kiba bat ia u lakam ka synshar khadar ba kin ioh ia ka contract.

Ki kyndon kyllum ha ka NIQ ka ong ba tang ki nongsengkam (Entrepreneur) kiba mihkhmat ia ki karkhana kiba don ia ki unit ba pynmih ia ka mar/karkhana ha ka Jylla kiba lah ban iashimbynta ha ka jingiathong, kampher la kine ki nongsengkam ki don ne em ia ka jingtbit ha ka jingpynmih ia ka mar ne kam shalan, ka dei ka bym donkam satia, ula ong.

Nalor kane, u Bah Roykupar ula ong ba ha ka technical bid ruh, ki kyndon ia ka jingdon pisa jong ki nongthong kam la pyn wan ha kata ka rukom ka ban ai jingmyntoi ia u/ka briew da kaba buh ia ka kyndon ba ka jingioh kamai ba shisnem (Annual Turnover) la buh ba kan long tang T.1 klur katba ha ka NIQ jong ka 11 tarik Rymphang 2022 na ka bynta ka contract kaba shongdor T.20,00,000,00, ka jingdonkam jong ka jingioh kamai ba shisnem lah ban buh ym dei ban duna ia ka T.10 klur na ka bynta ban ioh iashimbynta ha ka jingiathong ia ka kam.

“Kine ki kyndon ha ka NIQ kila pynsngew artatien halor ka jinglong shai ka rukom pyniaid ia ka jingthied ia kine ki tin sop iing bad lehse ka lah ban don ka jingpyrshang na ki bor khmih ban rieh ha lyndet kine ki kyndon tang ban ai jingmyntoi ia ki kompani ne nongsengkam ba don jingiadei ba kin ioh ia ka contract” ula ong.