Shillong, Rymphang 19 : Katba ki sngi ki nang jan sha ka Elekshon MP-Lok Sabha 2024, ka Indian National Congress ka la mad ia ka jingtynjuh da ka jingphet seng jong ki Nongialam bad ki nongkyrshan.
Mynta ka sngi Nyngkong, sa arngut ki MDC ka Congress ba mihkhmat sha ka Khasi Hills Autonomous District Council (KHADC), kila phet noh na kane ka Party barim duh jong ka Ri India.
Kine ki arngut ki dei u Bah Batskhem Ryntathiang, MDC ka Mairang bad u Bah Carnes Sohshang MDC ka Mawkyrwat.
Nalor kine, u MDC barim ka Congress na Sohra Bah Donovan Kharwanlang ruh, ula mih noh na ka Congress
Kine ki MDC bad u MDC barim kila rai ban pyniasoh noh ialade sha ka National People’s Party (NPP), kaba la nang ai mynsiem ia ka NPP ha ka jingpynkhreh ban mih sha ka lympung iakhun jong ka elekshon MP-Lok Sabha ka ban long ha kine ki khyndiat bnai ban wan.
Ia kine 3 ngut yn pdiang burom mynta ka sngi da u National President ka Party Conrad K Sangma bad u President ka NPP Meghalaya Bah Prestone Tynsong, ha ka jingialang ka ban long hapoh ka Ophis treikam ka NPP ha Lachumiere.
Kane ka jingwan pyniasoh kine ki MDC ka Congress kala nang pynbun paid ruh ia ka jingdon jong ki MDC ka NPP ha KHADC, kaba la kot mynta sha ka 13 ngut.
Lah ban kdew hangne, ka NPP bad ka Congress ki dei kiba iatreilang hapoh KHADC bad kila thaw iaka kynhun synrop Khasi Hills Democratic Front (KHDF) ban ialam ia ka Executive Committee.
